In su mese de cabidanni 2023, sos mastros chi aint binchidu su cuncursu Gavacciu Primarza 2020 de sa Sardigna, ant in finis alcansadu s’isettu insertu in su rolu, mancari arrivede cun d’unu ritardu de tres annos, in cunfrontu a sa data chi fit prenettada.

Custu protzessu l’ant alcansadu puru a una parte de sos chi fini abiles, e postos apprimu in sa graduatoria de meritu, chi fit bistada ingendrada cun d’una valididade de duos annos. Bell’e gai, a cajone de cuncursos novos, ligados a su PNRR, sos abiles a su cuncursu de su 2020 si sunt accattados e che essere postos assegus a sos binchidores de sos cuncursos novos, beninde privados de s’opportunidade de gosare de su secundu annu de valididade, chi a su cuminzu fit bistadu istabilidu po sa graduadoria.

Sa durada de duos annos de sa graduatoria est bistada accomettada a unu decretu chi fit a accabbadura, ingendrande meda problemas po sos mastros sardos, sos cales si sunt bidos abbutinados, in cunfruntu a sos cumpanzos insoro de sas atteras regiones. Custa situassione at anneadu meda sos interessados, chi ant postu sa chistione a su Cunsizzu Regionale de sa Sardigna, cun d’unu interrogu presentadu dae sos cunsizzeris Migheli Cossa, Annalisa Mele e Annalisa Manca.

Sos mastros binchidores e sos abiles ant dimandadu a subraera a sa Regione Sardigna de espressare sos interessos legittimos insoro, evidentziande s’abbisonzu de podere godire de s’annu de balididade chi a innantis fit bistadu prenettadu po sa graduadoria. Sa chistione est bistada jutta a s’attentzione de su Presidente de sa Giunta, Christian Solinas, e de s’assessore de s’istruzione pubbrica, Andria Biancareddu, cun d’una pregunta fatta dae sos tres cunsizzeris. In custa pregunta, sos cunsizzeris, ant chircadu de cumprendere si sas autoridades de sa Regione, connoscherana sa situassione, e itte cosa cherent faghere po resorvere su problema.

Accrarande chi 106 mastros abiles de sa Sardigna, sunt bistados chentza motivu abbutinados in cunfruntu a sos cumpanzos insoro de sas atterasregiones, sos cunsizzeris ant avidentziadu s’apprettu de pigare misuras po curreggere sa situassione, pro chi sos mastros de sa Sardigna potant operare remirande sas regulas istabilidas, contribbuinde a remintire paridade e zustissia in s’insertu in su rolu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22