S’iscola primarza de s’infantzia de s’istitutu cumpressivu duos “Monte Attu” de Turtulia, ada detzisu de intzididare a su programma “3Bee: a iscola de biodiversidade” po s’annu de iscola 2023-2024.

Custa initziativa, giutta a daenanti dae sa Naturetech 3Bee, proponnede unu addobiu didatticu nou e chenza cumpensu, chi interessada sa biodiversidade. Ponede a pare su Stem, s’imparu digitale, e s’esperientzia iscentifica, po formare siada sos mastros chi sos iscolanos, dande ispiratzione a s’ingendra noa. In pius de sas iscolas, puru impresas e amministrassiones tenene sa possibilidade de partetzipare a custu programma, isperande de adottare una o prus classes chi partetzipana a custu percursu educativu de sa biodiversidade.

Paris cun sa die internatzionale de s’educassione, s’iscola “Monte Attu”, ada fattu connoschere s’impignu sou po promovere s’educatzione de s’ambiente, cun programmas novos. Po custu annu de iscola, s’iscola ada abbratzadu su programma “3Bee” cun d’unu camminu chi faghede partetzipare sos iscolanos in sa bardiada de s’ambiente.

S’initziativa est ghiada dae sa 3Bee ,chi isfroscada tecnologias po sarbare sa biodiversidade. Su programma, serbidi po indilighire sos iscolanos zovanos supra cussu chi serbidi po tutelare sa biodiversidade, de sos babbauzzos chi Impringiana sos frores e comente andana a pare cun sa natura.

Sa classe 3A de s’iscola, est giai faghinde pratica , lessiones e disignos cun sa mastra Noemi Casula. Sa mastra est prena de galabera po custa esperientzia e narada chi est importante meda, de isfroscare abilidade po iscurtare, e meledare faghine partetzipare attivamente sos iscolanos, chi si ana a interessare a su mundu de sas abes.
Su programma est fraigadu in noe modolos, chi ponene a pare su digitale e s’iscentzia, faghinde pratica in iscola e in dommo.

Custu est unu percursu chi interessada meda non solu mastros e iscolanos, ma puru sas famiglias, dandeli abbastu, po si cumportare bene in sa vida de onzi die.

In sas festas de Nadale, sos pitzinnos, ana fattu attividade pratica, decorande pistoccos cun su mele, poninde a pare s’arte de ischire faghere e s’impignu po s’ambiente, e custu lis permittidi de faghere esperientzia e a su mattessi tempus de si disaogare.

Podene puru controllare a distanzia commente est andande sa salude de una casella de abes, chi est sutta su controllu de unu apiaresu de sa 3Bee chi tenede s’impignu de aggulustire cussu chi serbidi in sos terrinos
accurzu.

Gratzias a sa tecnologia 3Bee, donzi classe podet bintrare intro de unu portale on line chi si giamada Oasi digitale, inue bi est s’archiviu e su materiale de sa didattica e de sos cambiamentos chi arribana dae su campu, commente videos e fotograffias.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

TikTok, AI e sa manera noa de sos giòvanos de fàghere sas chircas online

In sos ùrtimos annos, sa manera de chircare novas de sos giòvanos est mudada in manera profunda. Si unu tempus Google e sas entziclopedias online fiant su puntu de partèntzia primàriu, oe no est prus gasi. Pitzocos e pitzocas meda preferint trastos de inteligèntzia artifitziale, chat innovativas e prataformas social comente TikTok, in ue vìdeos curtzos e crarimentos lestros permitint de cumprèndere luego sos cuntzetos dificultosos.

A bortas dae sos motores de chirca clàssicos non bi passant nemmancu. Sa chirca no est prus liniare e isulada. Sos giòvanos passant in presse dae vìdeos a post, dae link cumpartzidos in chat de grupu a discussiones in comunidades online. De custa manera sa chirca si faghet dinàmica e collaborativa: si passant sos pàrreres pari-pari, si ponent a cumone sas fontes e si ponent a cunfrontu sas novas in s’istante. Custu critèriu tenet de bonu chi est lestru e vàriu, ma bi cheret sensu crìticu ca non totu su chi s’agatat online est seguru o bene fatu.

Sos trastos de AI, pro esempru, permitint de tènnere rispostas in s’istante, curtzas e adatadas a chie preguntat, imbetzes TikTok e àteras prataformas social dant crarimentos visivos chi agiuant a ammentare mègius sas informatziones. Però, sa lestresa de s’impreu podet causare una connoschèntzia incumpleta, e duncas est de importàntzia manna a ischire chircare sas fontes giustas, a pònnere a cunfrontu argumentos diferentes e a organizare sas informatziones in manera informada.

Non cheret ismentigadu poi chi finas aplicatziones comente WhatsApp dant possibilidade de interrogare s’Inteligèntzia Artifitziale subra de tantas chistiones. A sa fine de sos contos, sos giòvanos de oe si movent in unu panorama digitale dificultosu ma prenu de oportunidades. Chie est bonu a impreare custos trastos cun impignu resurtat a mudare sa velotzidade de sa Retza in connoschèntzia cuncreta, impreende in sa mègius manera sa cantidade ispantosa de informos disponìbiles cun unu click.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”