Su Casteddu ada perdidu s’ambasciadore sou pius famadu, Gigi Riva, lunis sero, a s’edade de 79 annos, ghettande sa Sardigna in s’affinu po sa disparida de s’eroe sou, s’isportivu po primorosia. Su chi non si podet ismentigare, Rombo di Truono, cuberradu in s’ispidale po si essere intesu male, ada dassadu unu boidu chi no podet cambiare in su coro de sos sustenidores , chi si sunu movinde po s’urtimu saludu a su Re insoro.

Sa tzerimonia l’ana fatta derisi in s’istadiu Unipol Domus, inue ana fattu s’apposentu in onore de su giocadore de botza pius mannu. Su mortu, cun sa montura a colore de chelu famada meda de sos annos sessanta, che l’ana leada dae s’ispidale Brotzu, logu in su cale est bistadu cuberradu a urtimu, fintzas a s’istadiu chi ada bidu Gigi Riva lampare cun sa maglia ruja e blu, chi lu ada fattu diventare casi unu mitu. Oe a sas 16, bi ada essere s’interru in sa Basiliga de Bonaria de Casteddu, ghiada dae Mons. Zuesppe Baturi, piscopiu de sa tzittade.

Su dolore ada aggraidadu totta canta sa comunidade de sa Sardigna, e s’amministrazione de su Comunu de Casteddu, cun su sindigu Paulu Truzzu, ada detzisu su dolu de sa tzittade, dimustrande su rispettu e s’ammiratzione po su campione mannu. S’istadiu de su Casteddu, mancari siada unu logu prenu de ammentos de paristorias, parede chi non bi la fettada a custoire s’eredidade de su mitu Gigi Riva.

Sos sustenidores de su Casteddu, cun su disizzu de omaggiare s’addoru insoro, sognana de torrare a battizzare non solu s’istadiu de Casteddu,ma puru S’ispartu Carlo Felice, pensande de che ogare s’istatua de Carlo Felice cun un’opera dedicada a Gigi Riva. Sa galabera po custu disizzu, parede chi nascada cun d’una regorta de frimmas cumintzada dae su “Fan club Gigi Riva” in Facebook. S’intentu est cussu de ondrare s’eroe de tottu
cantos, cun d’unu attu chi si biada, chi pottad essere una testimonia po faghere ammentare semper sa paristoria sua in su coro de sos Sardos.

Adderettura calicunu ada fintaz fattu sa proposta de intitulare a Gigi Riva, carchi bia manna de sa Sardigna, chi pottada faghere de collegamentu po tottu sos sardos, commente su Ruju e Blu mannu ada unidu s’alentu de
tottu su populu de s’isula po deghinas de annos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sartiglia 2026 : connottu, caddos e contierras supra sa siguresa.

Sa Sartiglia de Aristanis torrat a colorare sas carrelas de sa tzittade cun sa sua ispettaculare cursa medievale cun sos caddos, unu de sos abbenimentos  prus ammaghiantes de su Carrasegare sardu. Setzidores caratzados a caddu si disaffiant in sa cursa a s’istedda e in sas parizas, mustrande abilidade e corazzu e muttinde appassionados de folklore e turistas dae tottu s’isula e dae fora. S’ispettaculu, cun raighinas de seculos, mustrat s’identidade culturale aristanesa, ma s’edissione de cust’annu est accumpanzada dae dibattas e contierras ligadas a sa siguresa.

Sas dispostas novas prenettant affianzos comente cascos e gorpettes po sos setzidores, ma sos ordiminzadores narant chi custos obbrigos arriscant de cumpromittere sa parte de su connottu e bisiva de sa Sartiglia, intre costumenes istoricos e caratzas tipicas.

S’amministratzione comunale at avantzadu interpretatziones chi diant permittire de faghere s’abbenimentu chentza revertire sas leghias antigas, mentres sa chistione est bistada discutida fintzas a livellu istitutzionale pro accrarare sas regulas. Sa cosa addurat cristallitzada, cun cussos chi sustentant su connottu chi dimandant de mantennere frimma s’identidade de sa manifestassione e cussos chi sunt interessados a tutelare sos setzidores e sos animales.

Sos Gremios istoricos, assotzios chi mustrant sos Gremios ligados a sa Sartiglia, ant ghettadu appellos po diffendere sa manifestassione in sa forma sua originale. Mancari sas tesones, sos ammanizos andant a daenanti intre proas, bestiduras e costumenes, dae sa frigura de Eleonora de Arborea fintzas a sos isseperos de sas parizas. Sa tzittade bivit unu fermentu chi aunit braga e murighinzu, mentres sa comunidade chircat de abbilantzare rispettu po su conntottu e attentzione a sas regulas novas de siguresa.

Sa Sartiglia addurat gai una frigura de istoria, comunidade e floklore, e sas contierras de cust’annu reflettint s’isfida chidrina de cunciliare su rispettu de su connottu antigu cun sas esigentzias de sa siguresa moderna. Abbenimentos comente sa Sartiglia non sunt solu ispettaculos, ma beros e proprios istrumentos de memoria de tottus e identidade culturale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22