S’otto de su mese de ennarzu de cust’annu, ada signadu unu momentu abberu istraordinariu po sa segnora Giannetta Marongiu, chi ada superadu sa linea de sos chentu annos de vida. Duncas, po un’attera orta, sa Sardigna si cunfirmat una terra de zente chi campada meda. Circundata dae s’affettu de sa famiglia sua e dae sos amigos, custa tzelebrazione est bistada rendida fintzas pius ispetziale, dae sa presentzia, in dommo de sa chentenaria, de s’assessore de su comune da Aristanis Ivano Cuccu.

Cust’urtimu, chi bestiada sa fasca de tres colores , ada dadu una targa, commente ammentu de sa die, po contu de su sindigu de Aristanis Massimiliano Sanna, e de totta sa comunidade de Aristanis, commente testimonia de rispettu e de ammiratzione po custa desamplada chentenarza.

Naschida in Crabas, s’otto de ennarzu de su millinoighentosvintibattoro, sa segnora Giannetta ada cumminzadu su percursu de sa vida sua, isposandesi cun Antoninu Cadeddu e andande a bistare in Aristanis in sos annos chimbanta de su seculu passadu. S’istoria sua si est intritzada cun cussa de su maridu, chi teniada unu zilleri cun una sala de biliardu in sa bia Figoli, unu logu de addobbiu, inue si argiolaiada cun sos amigos e bi andaiada paritza zente.

Mamma de tres fizzos, Augusto,Carlo e Pierfranco, oe, podede godire de sa cumpanzia de tres nepodes e ses fizzos de sos nepodes. Sa tzelebrazione de sos suos chent’annos, at accorradu deris totta sa famiglia sua, puru sos nepodes, tottu accorrados po onorare custa istraordinaria femmina.

Sa segnora Giannetta Marongiu, est meda connoschida in Aristanis non solu po sos chent’annos, ma puru po s’ncredulidade de sa passione artistica sua, ca acchirridi in manera prufunda tribagliare sa maglia e s’unchineddu. Finzas s’interessiu sou po sas mattas si est bidu semper e finzas oe, cun duda e passione, curada sas amadas mattas e sos frores.

Sa fide religiosa sua ada sempere tentu un arrolu tzentrale in sa vida sua, riessinde a formare sa personalidade sua. Sos fizzos la descriene commente un mastra in coghina, ammentandesi cun istima sos addobbios po mandigare cun Peppetto Pau, famadu non solu po sa cultura sua, ma puru po s’abilidade sua in sos furreddos.

Sa domo de Antonino Cadeddu, fidi unu logu de delissias de sa coghina, mescamente rendinde grazias a sos licanzosos puddittos cun sa bagna, coghinados cun abilidade manna dae sa segnora Giannetta.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22