Una cliente ricona de s’hotel Ritz de Parigi at denuntziadu su personale pro sa fura de una prenda pretziosa meda. Ma a s’agabbu s’est cumpresu chi nemos aiat furadu nudda.  Totu est cumentzadu in su Ritz, su famadu albergu de Parigi, una cliente aiat denuntziadu sa fura de un’aneddu de 750.000 èuros.

S’arcanu est cumintzadu in su mangianu de chenàbura colada e, a pustis de sas primas chircas, sa cliente aiat detzìdidu de fàghere denuntzia a sas autoridades. Sa bortada est arribbada in su mangianu de eris, lunis 11 nadale, cando su personale de su Ritz at agatadu sa prenda intro su sacu de s’iscova elètrica impreada pro sa netesa de sos aposentos: “Non s’est tratadu de una fura – assegurant dae sa diretzione de s’hotel -, su propietàriu podet torrare cando bolet a si nde lu boddire”. Su Ritz difatis at detzìdidu de ofèrrere tres notes de badas a sa cliente pro su fatu acadèssidu.

Sa propietària de s’aneddu, una imprendidora rica de sa Malaìsia, suspetaiat chi esseret istadu unu de sos dipendentes a furare s’aneddu. Segundu su chi at decraradu sa politzia frantzesa, sa fèmina diat àere pèrdidu s’aneddu intre sas 9.50 e sas 11.30. In cussu ratu de tempus difatis atismurgiadu in càmera, lassende sa prenda cun diamante de 6.51 caratos a curtzu a sa safata cun pratos e tzìcheras. Sa cliente posca est essida pro fàghere una passigiada intre sas butegas de sa zona e a sa torrada sua no at agatadu s’aneddu in su logu suo, cumintzende a incurpare su personale de s’istrutura. Sa denuntzia a sa politzia at fatu partire sas chircas e, a pustis de duas dies de chircas, s’arcanu est istadu risòlvidu: sa prenda, cun fortzis a pustis de èssere rutu a sa terra, fiat istadu aspiradu durante sas operatziones de netesa de sa càmera. Comente ispiegadu dae sa diretzione de su Ritz, s’aneddu est istadu agatadu “gràtzias a su traballu de chirca de sos agentes nostros de sa seguridade!”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Turismu, record novu po sa Sardigna: presentzias meda

Sos datos de s’istajone 2025 mustrados a sa Bit de Milano.

Su 2025 est bistadu un’annu eccetzionale po su turismu in Sardigna, cun numeros de record de bisitadores chi ant cunfirmadu s’isula intre sos logos prus disizados de su Mediterraneu. S’istajone at registradu una creschida custante in sos mesese de istiu e fintzas in s’istajone bassa, mustrande comente semper prus turistas seperent sa Sardigna fintzas in beranu e attonzu,attirados non solu dae sas plajas suas, ma fintzas dae sa ricchesa de cultura, natura e enogastronomia.

Sa capatzidade ritzettiva de s’isula est creschida meda, cun albergos e extra albergos novos, chi ant permittidu de accasazzare bisitadores chi arribant dae tottu s’Italia e dae fora. Intre sos istranzos sunt parizzos sos turistas chi arribant dae Germania, Francia, Svizzera e Regno Unito, mentres in Italia, sa Sardignas addurat unu logu preferridu po chie benit dae Lombardia e Lazio. Fintzas sos aeroportos de s’isula ant registradu una creschida de sos passezzeris, cunfirmande un’accreschimentu custante e s’interessu internatzionale pro sa Sardigna.

Addia de su turismu balneare, est creschinde meda s’offerta ligada a sos abbenimentos culturales, isportivos e a sa balorizzatzione de sos burgos e de sos caminos intre s’isula, chi at permittidu de dividere sos arrivos in atteras istajones e apparare esperientzias divressas. Abbenimentos comente su Giru de Sardigna in bicicretta e s’Americas Cup de bela in Casteddu sunt opportunidades importantes po faghere arribare bisitadores fintzas in sos meses chi benint cussiderados prus calmos, cun recaidas positivas po s’accolomia locale e po sos albergos de s’isula.

Su sutzessu de s’istajone 2025 cuffirmat s’importantzia istrategica de su turismu po s’accolomia sarda. Non si trattat solu de numeros e presentzias, ma de una parte chi dat unu contribbudu a mantennere bivu su connottu, balorizzare su patrimoniu naturale e culturale e creare logos de tribagliu. Sa Sardigna est mustrande de essere capatze de apparare unu turismu sustenibbile, divressu e de calidade, capatze de faghere arrivare bisitadores italianos e istranzos tottu s’annu.

Abbaidande a su tempus benidore, s’isula puntat a affortigare de pius custa creschida, imbestinde in sa promotzione internatzionale, in sa cura de sas iscroccas e in sa balorizzatzione de tottu su chi rendet sa Sardigna unica in sa bista de su mediterraneu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22