Sa Cummissione europea at declaradu estintu in manera ufitziale s’epidemia de pesta suina in s’àrea de bardiamentu de 15 chilòmetros a inghìriu a s’allevamentu de Durgali, in ue in cabudanni fiat istada identificada sa presèntzia de su genotipu 2 in tres porcos. Sa detzisione, votada chenàbura, at a èssere  publicada in manera formale in sa gazeta ufitziale europea sa chida imbeniente.

Su presidente de sa Regione, Christian Solinas, sutalìniat s’importu de evitare su passàgiu a s’annu de restritzione màssima pro s’àrea interessada, in manera diversa de cantu prevìdidu pro casos sìmiles. Sos territòrios incluidos in s’àrea de bardiamentu in cabudanni ant a èssere collocados in parte in sa zona 1, s’àrea “coscinu,” e in parte in sa zona 0, sena restritziones. Dòighi comunos sunt galu in fase de regulamentatzione pro sos porcos  non tzensidos in sa zona 3.

S’assessore regionale de sa Sanidade, Carlo Dòria, atribuit sa detzisione de Bruxelles a su reconnoschimentu de s’epidemia  in Durgali comente  “ocasionale.” Custu est istadu possìbile gràtzias a su bardiamentu ativu de s’Unidade de Progetu pro s’irraighinadura de sa peste suina e a sa collaboratzione de sos assòtzios venatòrios. Sa regorta de datos at cunfirmadu chi s’est tratadu de un’epidemia de “importatzione” meda limitadu.

Gràtzias a sa collaboratzione de sos cassadores, est istadu averguadu chi unos 350 sirbones sunt resurtados negativos, cunfirmende s’ausèntzia de trasmissione de su genotipu 2 in s’agreste. Custu resurtadu, giai tzertificadu dae sa Cummissione europea in s’agabbu de mese de ladàmine, at cumbintu Bruxelles a pigare custa detzisione.

Su presidente Solinas e s’assessora Dòria cuncordant in su fatu chi sa detzisione de Bruxelles rapresentet un’àteru reconnoschimentu de su modellu Sardigna in su chertu contra sa pesta suina africana.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22