At a èssere un’Annunou chi non at a coitare a iscarèschere su chi s’at a tzelebrare in sas pratzas de sa Sardigna, cun una isfilada de isteddos famados de sa mùsica italiana prontos a illuminare sa note de su 31 de nadale. Una filera de cantantes sena pretzedentes pro custu fine de annu, seguru su prus rica e scintillante de semper pro s’Ìsula.

In S’Alighera, sa traditzione de su “Cap de Any” si cunfirmat unu de is mègius cun su cuntzertu de Ligabue, s’artista chi at fatu s’istòria de su rock italianu. In sa note de Santu Silvestru, Ligabue at a èssere acostagiadu dae Tedua e Anna, promitende unu cuntzertu ùnicu chi at a allùere sa passione de su pùblicu.

Casteddu no at a èssere de mancu, rispondende cun su binchidore de s’ùrtimu Fèstival de Sanremo, Marco Mengoni. Su cantante de Ronciglione, in sa fiera tzitadina, at a cantare cun sa boghe poderosa sua totu sas cantzones prus famadas de su rpertòriu cosa sua.

Terranoa s’ammàniat a acollire duas iconas de sa mùsica italiana: Zucchero, su mastru de su blues, e Salmo, su rapadore sardu tra sos prus connotos in Itàlia. Unu cuncordu musicale chi promitet de fàghere baddare totu sa tzitade e de creare un’atmosfera indimenticàbile.

In Casteddu Sardu, protagonista de sa serada at a èssere Mahmood, binchidore de Sanremo e interprete de resessidas mannas chi ant conchistadu su pùblicu natzionale e internatzionale. Sa presèntzia sua at a furriare sa pratza de Casteddu Sardu a palcoscènicu de grandu prestìgiu.

Su duetu Francesco Renga e Nek at a fàghere tapa a Tàtari, oferende a su pùblicu una prova ammajadora e prena de emotziones. Un’oportunidade ùnica pro gosare de sa mùsica de duos artistas de cabbale!

In Igrèsias, su palcu at a èssere dominadu dae Fred De Palma, artista polièdricu chi cun sas cantzones atzisadoras  suas at a fàghere ballare e ispassiare su pùblicu presente.

Joe Bastianich, nòdidu fintzas pro sa passione sua pro sa mùsica, s’at a ammustrare cun sa banda sua in Crabonaxa, promitende una serada intregada a su ritmu e de sa bona mùsica.

Su giòvanu rapadore e cantautore Alfa at a èssere su protagonista in Tortolì, giughende sa frischesa e originalidade sua in su palcu ogiastrinu, mentras Noemi at a serrare sa serada in Nùgoro, animende su pùblicu cun sa boghe poderosa e sas cantzones suas chi ant conchistadu su coro de medas amantiosos.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22