Sos Carabineris de s’Istatzione locale de Pauli ant arrestadu eris unu pitzocu nigerianu de trintoto annos domitziliadu in Casteddu, denuntziende·lu in istadu de libertade a sa Procura de sa Repùblica acanta su Tribunale de Casteddu pro lesiones personales e interrutzione de pùblicu servìtziu.

S’òmine est suspetadu de èssere s’autore de àteros episòdios de violèntzia pretzedentes contra fèminas in Casteddu e a inghìriu de sa tzitade. S’ùrtima atzione criminale sua est acontèssida s’11 santandria coladu in  unu postale CTM a presu de sa crèsia Santìssima Vèrgine Assunta de Ceraxus.

Sa vìtima sua est istada  una fèmina de sessantases annos residente in Assèmini, chi at declaradu in sa testimonia detalliada sua de èssere istada minetzada sena perunu motivu aparente dae s’òmine nigerianu, chi li diat àere intimadu dende calare a sa firmada sighente a pustis de chi issa aiat agigu aferritadu su billete. Assuconada meda, sa fèmina s’est acurtziada a s’autista de su postale, ma s’istràngiu l’at iscuta e li at donadu una calada de pee forte a iscostadura.

Su conducente, comente si nd’est abigiadu de su chi fiat sutzessu, at sighidu sa cursa sua mutende deretu sos Carabineris. Su postale est istadu in deretura firmada cara a s’Istatzione de sos Carabineris  in sa bia de Cesare Crabas de Pauli. Sos militares de s’Arma nche sunt artziados a su postale e ant identificadu su suspetu nigerianu, chi est istadu lassadu andare ca sa vìtima, a s’època, aiat seberadu de non formalizare calicuna denuntzia contras de s’òmine.

Nointames, posca, sa fèmina at detzìdidu de presentare su matessi cuerela  a sos Carabineris chi ant protzedidu cun s’arrestu de su nigerianu de trintoto annos. Sos investigadores ant achiridu sos filmados de sas telecàmeras de bardiamentu in intro de su postale, rivelende fintzas àteras denuntzias sìmiles contra s’òmine pro episòdios uguales a cussu capitados in àteras ocasiones.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22