Custu contu lompet dae sos Istados Unidos acanta  un’òmine aiat pedidu a sa cumpàngia de no iscòviare nudda a nemos de sa bìnchida manna, ma issa at trogadu totu mutende a su telèfonu sos babbos de issu. Su binchidore de sa loteria l’at denuntziada pedende·li 100 mìgia dòllaros.

Su binchidore de unu de sos prèmios de sa loteria prus mannos de sos Istados Unidos, prus a mancu 1.35 milliardos de dòllaros, at fatu de totu pro no iscoviare a nemos custa bìnchida manna e pro tènnere su segretu su prus tempus  possìbile, sena lu nàrrere nemancu a su babbu e a sa mama. Ma calicuna cosa però no est andada comente issu pensaiat. Difatis no aiat pensadu a sa ex cumpàngia sua chi a iscusi de issu at naradu a sos  ex ghènneros chi su fìgiu fiat milliardàriu. Issu tando l’at fatu càusa  in tribunale. Mancu a lu nàrrere, s’stòria arribbat dae sos Istados Unidos, est a nàrrere dae su Maine,  ue su fortunadu binchidore de sa loteria Mega Millions at denuntziadu a sa mamma de sa fìgia de àere iscoviadu de sa bìnchida a sos babbos suos. Difatis s’òmine aiat fatu firmare a s’ex pubidda un’acòrdiu acanta poniat a giura de non nàrrere a nemos de sa bìnchida fortunosa.  Sa fèmina però no est abarrada in su faeddu e pro cussu s’ex cumpàngiu at presentadu càusa a su tribunale de Portland,  pedende li unu risartzimentu de 100 mìgia dòllaros.

S’identidade sua fiat abarrada acuada pro prus de unu mese, finas a freàrgiu cando s’est presentadu pro retirare su prèmiu, su de bator prèmios prus mannu in s’istòria de sos Istados Unidos, e at iscobertu chi sa cumpàngia betza no aiat poderadu su segretu. Issu aiat seberadu de abarrare anònimu e de nde fàghere retirare sa summa dae una sotziedade imbetzes de lu retzire a derramas in una pariga de annos.

Pro fàghere in custa manera at dèpidu renuntziare a una parte de su dinare, ma s’iscopu fiat su de non fàghere connòschere a nemos s’identidade sua, mancu a sos babbos.  Mèrcuris coladu unu giùighe at acollidu sa recherta de s’òmine de andare a in antis cun sa càusa poderende però semper s’anonimadu, cun su pseudònimu de “John Doe”.  Fintzas sa fèmina at dèvidu acure s’identidade sua, impreende su s’annomìngiu de, “Sara Smith”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22