In sa capitale toscana, in Firentze, unu tentativu de fura in su ristorante Gargantua in bia de San Gallo est istadu in deretura interrùmpidu dae sa politzia, chi at arrestadu duos giòvanos delincuentes: su primu est unu pitzocu de degheoto annos algerinu e ‘àteru est unu pitzocu marochinu de bintibator annos.

S’atzione criminale est istada isbentada sa note de su 17 de onniasantu, arbeschende a su 18, cando sos duos suspetos, a pustis de àere abetadu istunus-istinus foras de su locale pro unos cantos minutos, ant fortzadu su bandone e sa ghenna de su ristorante.

Su piseddu de degheoto annos est intradu in su locale, imbetzes su còmplitze suo, su marochinu de 24 annos, est abarradu foras in caminu pro fàghere sa guàrdia. De totu custu trumbulu però si nde sunt acatados sos guardianos chi ogna note faghent su giru de controllu de sos locales e ristorantes de sa zona e prus che totu a  sos politziotos de vigilàntzia in su palatzu de bia de Zara, chi sunt intervènnidos in deretura pro firmare sos duos furones. Sos agentes de s’iscuadra mòbile fiorentina ant inghiriadu a sa lestra sos su locale, serrende totus sas essidas.

Unu de sos suspetados est istadu firmadu deretu pròpiu in intro de su ristorantee, mentras su cumpàngiu suo, in unu primu momentu, pariat iscumpartu.  Difatis sos agentes l’ant chircadu apetotu, ma de issu nimancu s’umbra. Pariat chi nche esseret essidu in s’aera. Ma in veridade, gràtzias a unu controllu prus sprofundidu, sos investigadores de s’iscuadra mòbile l’ant individuadu in sos aposentos postos a palas de su ristorante, cuadu intro unu cungeladore mannu. Su furone, cando at bitu sos politzotos s’est lassadu acapiare in deretura sena si opònnere, fintzas pro more chi fiat cumentzende a su cungelare issu e totu pro more de su fritu.

Durante sos controllos in sa butzaca de su marochinu de bintibator annos est istada agatada  una crae a crichetu, fortzis cussa chi fiat istada impreada pro fortzare s’intrada de su ristorante. S’interventu lestru de sas fortzas de s’òrdine at impedidu a sos furones de si la iscabulire, cunfirmende s’eficatzidade de sas mesuras de seguridade e de sos servìtzios de vigilàntzia presentes in sa zona de San Gallo.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22