In ocasione de ssos 79 annos de Gigi Riva de martis  su 7 de santandria, su mundu de su fùbbalu e non cussu ebbia, s’ammàniat a donare sos onores a custu mitu bividore de s’isport.

In su 2014, in ocasione de sos 70 annos, un’imàgine de Gigi Riva cun sa màllia de su Casteddu impreada durante s’istòrica istajone 1969-1970, cun sos bratzos pinnigados e una mirada orgulliosa, fiat istada impreada dae totu sos giornales isportivos natzionales printzipales pro onorare sa figura de custu campione.

Custa foto, devènnida oramai un’icona, como est istada impreada comente  modellu pro sa creatzione de unu bustu  dedicadu a su calciadore prus mannu chi su Casteddu apat mai connotu. Gigi Riva, nòdidu pro sos 207 gol suos, est totora su mègius marcadore de sa natzionale italiana, gràtzias a sos 35 gol marcados in 42 presèntzias bbia cun sa màllia asula.

Custu bustu est però un’òpera particulare. Pro la fàghere nche at bòlidu prus de unu mese de traballu, impreende bene 12.000 matoneddos. S’autore est s’artista sardu Maurizio Lampis, nòdidu in totu su mundu pro sas riprodutziones istraordinàrias suas de Ligo, comente, pro nde ammentare unas, Pratza San Marco de Venètzia e sa Funtana de Trevi de Roma.

Su bultu, artu 140 tzentìmetros, est unu domu a custu campione de Leggiuno chi at seberadu Casteddu comente  segunda pàtria sua. Sa realizatzione est istada traballosa meda, comente  ispiegat at ispiegadu Lampis etotu a s’ANSA: “S’idea est nàschida unos cantos meses a oe pompiende in ìnternet. Apo iscobertu sas realizatziones in Lego de calciadores comente  Totti e Lewandowski. In cuddu  momentu apo pessadu: Gigi Riva est unu mitu issu e si meritat unu bultu de Lego issu puru! In totu custos annos apo realizadu de totu, ma mai aia intentadu de riproduire una figura umana. Sa tècnica impreada est diferente respetu a sa creatzione de monumentos o casteddos medievales, ca custa borta si trataiat de dare vida a una figura umana cun curvas e lineamentos bene definidos. Cunsiderende sa natura de sos matoneddos Lego, una còpia perfeta no est possìbile, ma so satisfatu de su resurtadu”.

S’òpera at a èssere esposta a su pùblicu in su “Museo del Mattoncino Karalisbrick” de Casteddu, ma at a èssere presentada in anteprima a Gigi Riva etotu, chi at giai espressadu sa voluntade de l’autografare.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”