Sa bidda de Arbatassa s’est ammaniende pro sas ripresas de su programa “Il Borgo dei Borghi” de Rai 3, e sa comunidade locale est pregiada meda de partetzipare a custu cuncursu televisivu famadu. Durante una riunione tzitadina cun s’amministratzione comunale, sos residentes si sunt riunidos pro organizare s’eventu e avalorare sos caminos e sos logos significativos de sa bidda marinara chi ant a èssere protagonistas de su programa.

Sos abitantes e sos cummentziantes ant naradu in deretura de èssere disponìbiles a megiorare su bighinadu issoro, fintzas a traessu de progetos piticos de ricualificatzione, ponende frores e matas. S’iscuadra de sa trasmissione televisiva est pro lòmpere a Ogiastra e sa comunidade est determinada a fàghere una impressione bona.

Arbatassa s’at a presentare comente  sa ghenna de s’Ogiastra. Sa cartolina de bisita at a èssere  s’imponente Monumentu Naturale de sas Rocas Rujas, chi nde istupat dae sas abbas in colore de ismeraldu. A probe decusta meravìllia naturale s’agatat su portu de Arbatassa, puntu de arribu pro sos turistas e puntu de partèntzia pro s’esploratzione de sas calas ogiastrinas. Sas marinas de sa zona sunt intre sas prus premiadas cun sas “banderas biaitas” pro sa bellesa  e netesa issoro.

In prus totu su territòriu est prenu de medas monumentos antigos, a cumentzare dae s’edade nuràgica, paris cun rastros de fenìtzios, pùnicos e romanos. Bastat a pensare a su cumplessu de su nuraghesu de s’Ortali ‘e su Monti e sas turres de controllu ispagnolas, comente  sa turre de San Miguel, chu testimòniant su domìniu ispagnolu in sa regione. Su patrimòniu artìsticu est arrichidu dae sos monumentos presentes in sa tzitade de Tortolì, comente s’ex catedrale de Santu Andria, cun s’altare pomposu suo in màrmaros polìcromos.

Ma sas ispetzialidades prus chircadas dae sos bisitadores, e chi seguramente ant a èssere postas in mustra in su programma televisivu, sunt sos produtos locales, comente sos  culurgiones, sena contare su pische de s’istàinu.

In prus b’at a èssere tretu pro chistionare de sa festa de Stella Maris, chi si festat a sa fine de trìulas, cun una professone in mare acanta sa cresiedda de Arbatassa. Sa comunidade non biet s’ora e est cuntenta meda de ammustrare sa bellesa sua rica de istòria a su pùblicu de su programa televisivu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22