Est bia pro miràculu sa pitzinna de prus pagu de 4 annos chi nd’est ruta dae su de chimbe pianos de unu palatzu in  bia de Nizza 389, in sa periferia de Torinu custu mangianu.

Sa pitica s’intendet bene e immoe s’agatat in s’ispidale infantile Regina Margherita pro controllos. A atirare s’atentzione diat èssere istadu unu pitzocu chi fiat incraradu a su curridòriu de un’àteru palatzu. Cando at bidu sa pipia chi fiat incrarendesi meda at cumentzadu a abboghinare. Mattia Aguzzi, impreadu de 37 annos chi fiat colende in caminu cun s’amorada  at assistidu a s’iscena  e, cando sa pitzinna nd’est rùida est resèssidu a l’atzapare primu de lòmpere a terra.

S’òmine est istadu leadu a su Cto pro unu suspetu tràuma a sas petorras a a sos bratzos, ma istat bene. Sa pitica puru non tenet lesiones e est in osservatzione in su repartu de chirurgia pediàtrica. Si non b’at a àere imprevistos, diat dèvere èssere dimìtida lunis.

«Custu mangianu so essidu dae domo cun sa pisedda mea – rat contadu s’impegadu de 37 annos a sos giornalistasa -. So coladu de cussu caminu pro cumbinatzione, pro more chi fradile meu m’ait mutidu pro mi pedire de li giùghere pane. A unu tzertu puntu amus intesu abboghinende su pitzocu chi aiat bidu sa pisedda in su cornicione. Deo l’apo naradu de istare firma, de torrare in segus. Ma issa non m’intendiat. A cuddu puntu mi so postu a suta finas a cando l’apo bida ruende e l’apo tenta».

«Apo isperadu chi andaret totu bene. Praticamente apo illebiadu su corfu cun sas petorras e semus rùidos a terra ambos duos».

Pro Mattia su sìndigu de Torinu  cheret propònnere a su Cussìgiu comunale de li cunferire sa Tzìvica Benemerèntzia, «in sinnu de ringratziamentu dae banda de sa Tzitade e a reconnoschimentu de su gestu balentiosu suo»

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su comune de Ulassai, cun s’azzudu de s’Istazione de s’Arte,avviat sa “Prima Biennale de Arte de oe”dedicada a Maria Lai, artista famosa sarda, morta in su 2013. Dae su duos de lampadas fintzas a Santuaini, su museu de arte de oe e su Camuc Domo Cannas ant accasazare sas operas de 25 artistas sardos.

S’abbenimentu, intituladu “Disignu e destinu”,iscumbattit su tema”artista e iscrocca”, unu donu a su ligonzu fungudu chi Maria Lai at semper contivizadu cun sa idda chi l’at bida naschere, sa comunidade locale e sa bista, siat fisicu chi astrattu. Custa Biennale est ordiminzada intro de su disignu Borghi, finantziadu dae s’Unione Europea cun sos fundos de su PNRR, po mesu de su programma Next generation.

Su sindigu de Ulassai, Giuanne Soru, at nadu:”Est unu reconnoschimentu e unu ringratziamentu a un’artista chi at ischidu creare unu ligonzu chi non si podet isboligare cun sa comunidade nostra”.Luisella Cannas e Claudia Contu ant presentadu s’Istazione de s’Arte, commente su”coronamentu de unu sognu peronale e de tottus”, naschidu 43 annos faghede cun sa proa de arte pubbrica “ Si ligare a sa montera”.

S’Istazione de s’Arte tenet su compidu de baloritzare custa eredidade e de agguantare su faeddu artisticu in su millenniu nou.

Maria Lai, creiat de sicuru chi “sa zente tenet bisonzu de arte pius de cantu non penset”, e chi “sa materia prima de s’arte siat sutta de terra e po l’acciappare b’at bisonzu de isfossare sutta de raighinas fungudas; solu pustis de aere isfossadu si acciappant sos elementos po fraigare su nou”.

Su direttore artisticu Gianni Murtas, faeddande de sa Biennale, at nadu:”Non si tratta de agattare eredes, ma de cumprendere si sas intuitziones de Maria Lai tenent unu sensu in s’arte de oe, si sa ricchesa de sas chertas suas si podet cunfrontare cun su presente. Nois creimos chi emmo”.

S’abertura de sa Biennale at abbojare cun sa fine de s’Ulassai Festival, chi at essere dae su 31 de maju cun tres dies dedicadas a s’apperricamentu e s’isport a s’abbertu, creande unu accropamentu de arte,natura e comunidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22