Un’episòdiu de violèntzia familiare est agabbadu cun s’arrestu de unu pitzocu de 35 annos de Ceraxus, signaladu pro maltratamentos in famìlia, violèntzia e resistèntzia a pùblicu ufitziale. Su giòvanu, disocupadu e sena pretzedentes penales, at isciusciadu s’abitatzione sua e at iscutu sa mama, custringhende·la a si nche fuire a domo de unos parentes.

S’intzidente est acontèssidu sa note colada, cando a inghìriu a sa una est lòmpida una mutida de apretu a su 112. Sa mama de s’òmine at mutidu sos carabineris narende chi su fìgiu aiat isciusciadu sa domo e l’aiat iscuta. Sa situatzione fiat devènnida gasi crìtica chi sa fèmina est istada custrinta a si fuire pro si sarbare.

Sos Carabineris sunt intervènnidos e in deretura sunt arribados a s’abitatzione. Sa situatzione chi ant agatadu però non fiat simple. Difati su pitzocu de 35 annos fiat malu de amasedare. S’òmine s’est opostu a s’arrestu in modu violentu.  Pro custu sos agentes sunt istados custrintos a impreare sa pistola elètrica Taser, unu trastu non mortale chi est impreadu semper de prus pro neutralizare sugetos violentos sena però causare dannos permanentes.

Sa mama at naradu a sos incuirentes chi custu no est istadu unu casu isoladu, ma prusaprestu s’ùrtimu de una sèrie de episòdios de violèntzia domèstica subida pros manu su fìgiu. Sa fèmina, timende pro sa  seguridade sua, est istada cussigiada de chircare agiudu acanta unu tzentru antiviolenza. In su mentrestempus est istadu ativadu su protocollu connotu comente  “còdighe ruju”, chi cumportat medidas de amparu e suportu lestru pro sas vìtimas de violèntzia domèstica.

S’arrestadu est istadu acumpangiadu a su càrtzere de Uda, mentras s’intzidente ponet a notu s’importàntzia de comente s’impreu de su Taser comente  trastu deterrente in sas situatziones in ue s’impreu de sa fortza  diat pòdere èssere evitadu. S’eventu, in prus, ponet s’atzentu subra su problema de sa violèntzia domèstica e de frunire risursas a sas persones chi nde sunt vìtimas, chirchende de garantire sa seguridade e su benèssere issoro.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Energia, creschet s’ispesa pro impresas e famìllias sardas

Sas impresas e sas famìllias sardas sunt sighende a fàghere sos contos cun una depressione energètica chi, nointames de sos primos signales de rallentamentu, paret ancora resistente meda.

Su pesu de sas bulletas abarrat artu meda e nch’est ancora a tesu sa normalidade de sos prètzios de in anti de sa crisi. S’energia abarrat unu de sos fatores chi pesant de prus subra de sa solididade econòmica de sa Sardigna, cunditzionende non sa cumpetitividade de sas aziendas ebbia, ma finas sa calidade de sa vida de sa gente.

Sas impresas piticas e medianas de s’ìsula ant tentu un’ispesa in prus de 77 milliones de èuros (prus o mancu) causada dae s’energia incarida. Unu nùmeru importante chi ponet frenos a sas intradas, ponet barrancos a sos investimentos e bortas meda non permitit sa pianificatzione de sa crèschida. Finas pro sas famìllias sardas sa situatzione abarrat dificultosa. Sos prètzios pro s’impreu de s’elètricu e de su gas in paragone a su 2021sunt prus artos de su 42,3%.

Su cunfrontu cun situatziones europeas prus o mancu che pare ponet in evidèntzia comente a sas impresas sardas piticas e medianas lis tocat de parare fronte a una diferèntzia cumpetitiva carculada in 14 milliones de èuros. S’energia duncas est est una de sas isfidas prus importantes pro s’isvilupu econòmicu de s’ìsula. A minimare su càrrigu fiscale in sas bulletas, faghende finas interventos mirados pro fàghere crèschere sa resa energètica e s’auto-produtzione, podet dare un’agiudu pro chi su benidore de sas impresas e de sas famìllias sardas si potzat suportare mègius.

Su de passare a fontes rinnovàbiles e su de megiorare sos consumos sunt trastes primàrios pro minimare sa dipendèntzia dae sos mercados de fora e pro trasformare s’ispesa pro s’energia in una possibilidade de crèschida, cumpetitividade e annoamentu. In una situatzione econòmica globale pagu segura, a moderare s’ispesa energètica est indispensàbile pro dare istabilidade a sas aziendas, pro agiuare sa gente e pro s’isvilupu sostenìbile de sa Sardigna intrea.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”