Roberto Mancini s’est dimìtidu dae cummissàriu tècnicu de sa Natzionale italiana de fùbbalu. Sa detzisione de su cummissàriu tècnicu campione de Europa in càrriga arribbat a ispantu a pagas dies dae sa nòmina de moderadore de sas Natzionales.

Sa Figc at publicadu in su situ ufitziale s’annùntziu de sas dimissiones de su cummissàriu tècnicu cun custos faeddos: «Sa Federatzione italiana de fùbbalu comùnicat de àere pigadu atu de sas dimissiones de Roberto Mancini dae sa càrriga de cummissàriu tècnicu de sa Natzionale italiana, retzidas eris sero a tardu».

In chimbe annos de traballu, Mancini at ghiadu sos asulos in 61 partidas, realizende una mèdia de vitòrias intre sas prus artas in assolutu. Su bilantzu est de 37 vitòrias, 15 parègios e 9 derrotas. In mesu una tiria de 37 resurtados ùtiles consecutivos e mescamente un’Europeu bintu in Wembley contra s’Inghilterra. Abarrat però sa mantza de sa mancada cualificatzione a sos Mundiales de Qatàr 2022 cun sos asulos acabbados a palas de s’Isvìtzera in su girone e posca cassados in Palermu dae sa Matzedònia de su Nord.

Mentras sa Figc est giai traballende pro agatare in sas diens imbenientes s’allenadore nou de sos asulos, benit naturale s’acostamentu cun sos duos tècnicos chi a su presente sunt lìberos: Conte, chi at giai allenadu s’Itàlia intre su 2014 e su 2016, e in martzu coladu at risòlvidu su cuntratu cun su Tottenham e Spalletti chi imbetzes at saludadu su Napoli a pustis de àere bintu s’iscudetu, ma at torradu a nàrrere prus de una bia de non cèrrere colare custu  perìodu comente un’annu sabàticu.

Ma sa lista de sos ct potentziales non si firmat a custas duas candidadura. Difatis s’allegat fintzas de Fabio Cannavaro, campione de su mundu 2006 cun una carriera de allenadore mescamente in Tzina e una esperièntzia pitica a su Beneventu in B in s’annu coladu, e Daniele De Rossi, collaboradore de Mancini, fintzas issu protagonista de una esperièntzia negativa e cutza comente allenadore de sa Spal.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Unu abbenimentu importante in Tàtari subra de s’intelligèntzia artifitziale a su servìtziu de su turismu e de sa cultura

Comente podet s’intelligèntzia artifitziale rivolutzionare su turismu e sa balorizatzione de sos benes culturales? Si nd’at a faeddare chenabura 14 de santandria in Tàtari in s’Innovators Day, una die dedicada a s’innovatzione digitale in sos campos turìsticos e culturales.

S’abbenimentu est promòvidu dae e.INS Spoke 2 – Ecosistema de s’Innovatzione de su Nord Sardigna, initziativa de s’Universidade de Tàtari nàschida pro acumpanzare impresas e istitutziones in sa transitzione digitale de s’iscrocca, in collaboratzione cun una retza de partner pùblicos e privados.

Unu addobiu chi si est fatu netzessàriu ca su raportu intre cultura e intelligèntzia artifitziale intre sos incarrigados a su campu est fàghinde nàschere semper prus dimandas. S’addobiu si at a tènnere in sa sala cunvègnos de Promocamera, in Predda Niedda, e at a propònnere addobios, laboratorios e momentos de cunfrontu dedicados a comunicatzione, marketing, innovatzione e intelligèntzia artifitziale.

Ant a pigare parte chimbe espertos chi ant a battire esperièntzias cuncretas e bisiones pro su benidore: Maurizio Orgiana, espertu de impreu de sas destinatziones turìsticas; Nausica Montemurro, analista de sas tendèntzias e cunsulente de comunicatzione e innovatzione; Alessandro Argiolas, ispetzialista de innovatzione aziendale e aplicatziones de s’intelligèntzia artifitziale; Jessica Cani, esperta de comunicatzione e promotzione enogastronòmica e territòriale; e Gianluigi Tiddia, cunsulente de comunicatzione digitale e promozione turìstica.

S’initziativa est po tribagliadores de su turismu e de sa cultura, impresas, assòtzios, entes pùblicos, istudiantes e professonistas de su campu, apparande un’ occasione cuncreta pro pònnere in retza ideas, persones e progetos e fraigare collaboratziones novas intre su mundu acadèmicu, imprenditoriale e territòriale, cun s’intentu de fàghere sa Sardigna prus innovativa, sostenìbile e capatze de balorizare su patrimòniu culturale e naturale suo gràtzias a sas opportunidades apparadas dae sas tecnologias novas.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”