S’aeroportu de Casteddu-Su Masu at serradu su mese de trìulas cun una performance etzetzionale, crompende sa prima borta su traguardu de sos 600.000 passigeris, cunsiderende siat sos arribos siat sas partèntzias. Custu resurtadu at superadu su primadu pretzedente, istabilidu in s’austu de su 2019, cunfirmende una crèschida costante de su tràficu aèreu in s’iscalu sardu.

Ocannu, giai sos meses de maju e làmpadas ant evidentziadu tzifras bonas, cun 443.775 e 525.698 passigeris, ma est istadu su mese de trìulas a signare una bortada ispantosa, totalende su bellu de 614.674 passigeris. Custu at fatu lòmpere su totale de sos biagiadores durante su cumintzu de s’istiu (maju-trìulas) a 1.584.147 in totu.

Sa crèschida de s’afluèntzia est galu prus arta si cunsideremus su cunfrontu annu cun annu de sos primos tres meses de s’istade 23, ue si sunt registrados aumentos significativos in sos volùmenes de tràficu subra sas tratas internatzionales. Maju at registradu una crèschida de s’11,8%, làmpadas de su 10,4%, e trìulas de s’11,9%. Unu datu bonu chi dimustrat comente Casteddu-Su Masu siat semper prus apretziadu comente iscalu internatzionale de riferimentu.

Analizende sos datos prus in sa minuda, in trìulas 2023, bene 412.762 passigeris ant boladu in sas 41 rotas natzionales, mentras 201.912 biagiadores ant seberadu sas 50 tratas internatzionales. Custu sutalìniat s’importu de s’aeroportu sardu siat pro sos collegamentos domèsticos, siat pro cuddos internatzionales, oferende una gama ampra de sèberos de biàgiu a sos passigeris.

Sa tendèntzia positiva sighit fintzas in su perìodu dae ghennàrgiu a trìulas 2023. In custu ratu de tempus s’aeroportu at acollidu in manera cumplessiva 2.702.493 passigeris. Su datu rifletet una crèschida importante de su 13,9% respetu a su matessi perìodu de su 2022 e una crèschida de su 3,9% respetu a ghennàrgiu-trìulas 2019, dimustrende sa costàntzia de sa crèschida de su tràficu aèreu in sos annos.

Custos resurtados ant dadu otimismu a sos operadores de su setore e a sas autoridades aeroportuales, in bista de sa segunda parte de s’istajone istiale 2023. In totale, s’aeroportu de Casteddu-Su Masu bantat  91 collegamentos diretos intre 18 Istados, operados dae 23 diversas cumpangias aèreas. Custa rete manna de destinatziones internatzionales faghet de s’aeroportu sardu una meta importante siat pro sos turistas siat pro sos biagiadores de afares, contribuende in manera significativa a sa crèschida econòmica e a su turismu in sa regione.

Nointames sa resessida de s’aeroportu de Casteddu-Su Masu, est importante sighire a garantire istandard de seguridade artos e calidade de sos servìtzios pro satisfàghere sa crèschida de sa dimanda e mantènnere sa fidùtzia de sos passigeris. Sa gestione e s’isvilupu infrastruturale, paris cun una pianificatzione sèria de sas rotas, ant a èssere fundamentales pro sustentare custa crèschida costante e consolidare sa positzione de Casteddu-Su Masu comente unu de sos aeroportos prus importantes e dinàmicos de s’Itàlia e de s’Europa.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

In arrivu dae sa secunda edissione de s’Oscar de sas Regiones , unu abbenimentu istravanadu chi at a tennere in su coro chi toccheddat de Roma, intro de sos conas istudios de Cinecittà: Custa proa, naschida cun s’intentu de dare gabbale e visibilidade a sas tradissiones e produssiones regionales de eccellentzia, si arviat commente un’occasione unica po tzelebrare sa ricchesa e diversidade de sas terras nostras italianas..

Sa Sardigna, cun sa cultura sua de mizza annos e sas tradissiones chi , accisant, at essere interprete chentza discussione de custu istravanadu abbenimentu. Feminas e omines bestidos cun sos ispantosos costumenes de sa tradissione, ant essere prontos a bogare a campu una variedade manna de ispettaculos chi ant andare a daenanti in sas duas dies de festa.

Unu donu chi drinnit a una tradissione chi affundat sas raighinas in su passadu e chi sighit a brillare cun sa lughe sua in su presente. In mesu de sos ispettaculos pius ispettados bi ant essere sas Mascheras, custodes autentigos de una tradissione longa casi 3.000 annos. Custas figuras prenas de misteru anti isfilare cun destresa in sa Cinecittà Street, accumpanzadas dae sos sonos galanosos de sos marratzos.

In mesu de issas, s’Orku, una maschera cun su corpu de omine e sa conca de animale, imboligada in d’una pedde niedda de animale, cun corros longos supra de sa conca e carrigas de marratzos, chi at essere sa reina assoluda de
s’isfilada. Accanta a issa, sos Mustayonis, bragosos portadores de sa tradissione, cun sas pertigas de ozzastru e sas cannas, bestidos cun beistires betzos e muccadores nieddos in conca, chi ant affadare su pubbricu cun sas istravanadas movidas insoro.

Ma s’Oscar de sas Regiones non si at a firmare solu a s’ispettaculu chi si podet biere: sos visitadores ant a tennere s’occasione de si affundare in sa cultura sarda po mesu de unu beru percursu de su gustu. In sas carrelas de Cinecittà World, ant essere presentadas operas de magistros fattas in suerzu, podottos de mandigare e ispecialidades de sa Sardigna, commente sebadas e porcheddos coghinados in sa brasia. E po accumpanzare custa esperientzia unica de sos sensos, no ant a mancare sas birras de sos magistros de sa regione, chi ant a delissiare sa ucca de tottu sos presentes.

Ma s’Oscar de sas Regiones non tiada essere cumpridu chentza sa musica chi at accumpanzare sos ispettaculos. In su mentres de sas duas dies, su pubbricu at a podere godire de musica dae su bivu, antiga e de sa tradissione sarda, po arrivare a sas interpretassiones de sas cantones pius famadas commente cussas de sos Tazenda e de Piero Marras. E po unu toccu de maghia in pius, no at a mancare s’ispettaculu chi che ogat s’alenu de Feuer Frei, una truppa de artistas chi ant a ballare sighinde sa musica imboligada dae su fogu e su laser, donande un’ispettaculu chi non si at a podere ismentigare e chi at a dassare tottus chentza alenu.

S’Oscar de sas Regiones, duncas, at a donare duas dies de ispantu e emotziones, un’occasione istravanada po si affundare in sa bellesa e sa diversidade de sas tradissiones italianas e bivere un’esperientzia chi non
si at a podere ismentigare e chi at addurare imprentada in sos coros de tottu sos chi ant a partetzipare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22