Sa pitica fiat istada posta in unu sacu de s’arga e fuliada. Unu cane sena maere, chi fortzis si la cheriat papare, fortzis sena lu chèrrere l’at sarvada.

Una cria abbandonada intre sos sicos de s’arga est istada sarbada dae unu cane randagio: s’istòria arribbat dae Trìpoli, segunda tzitade de su Lìbanu, ue s’atentzione de unu passante at intesu sos lamentos bènnidos dae unu sacu nieddu tentu in buca de unu cane. In intro b’aiat una pipia, chi posca est istada leada a sa lestra a s’ispidale tzitadinu pro retzire sas curas netzessàrias. Sas imàgines chi tzìrculant in sa rete ammustrant sa pipiedda cun lidigores rujos in sa cara e in su corpus, ma sana e sarva.

Comente contat su cuotidianu libanesu digitale Safir Al Shamal sa pitzinna est istada ghetada in s’arga dae sa mama pagu a pustis de èssere nàschida. No ischimus si su cane chi at agatadu su sacu nieddu boliat sarbare sa pipia ma de seguru s’interventu de unu passante at evitadu su peus.

Sas autoridades sunt indaghende. Cando sa pitzinna s’at a torrare a leare, si perunu s’at a ofèrrere de l’adotare at a èssere posta in un’orfanotròfiu a pustis de sa comunicatzione a su pùblicu ministeru. Abdulrahman Darwish, unu rapresentante in Trìpoli de s’Unione de sos assòtzios de sucursu e isvilupu, at afirmadu de non crèere chi s’intzidente apat tentu ite fàghere cun sa comunidade de rifugiados sirianos in Lìbanu, ma chi cun ogni probabilidade sa mama siat una fèmina de su logu disperada, fortzis pòvera e sola, in unu Paisu chi dae annos est bivende suta una crisi econòmica mala .

Segundu unu raportu publicadu dae UN’Interim Force in Lìbanu “unu pipiu ogna duos est in arriscu de violèntzia fìsica, psicològica o sessuale. A càusa de sa poberesa de sas famìlias, sos pipios current s’arriscu de graves violatziones, comente matrimònios primidios, traballu minorile e abusos”. S’istùdiu at  sutaliniadu chi “unos 1,8 milliones de pipios in Lìbanu (prus de su 80% de su totale) sunt bivende una poberesa multidimensionale – respetu a sos belle 900.000 de su 2019 – e arriscant de èssere custrintos a subire maltratamentos e violèntzias”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22