Torrat a criare in su Poeto, torra a Cuartu, galu ssa: sa Caretta Caretta. Sa genia prus difusa de sos tostino marinos at seberadu sa costat de Cuartu pro depònnere sos oos suos. Semper a presu de sa passerella agigu sistemada dae s’Amministratzione in s’oru de pratza Olla.

Sa zona interessada est istada acresurada dae sos espertos de su Corpu Forestale e at a bisongiare como unu compudu costante de sa zona pro evitare chi bèngiant tocadas sos oos. Sa genia est difatis esposta a unu tassu artu meda de mortalidade, e in particulare sa fase de sa riprodutzione est de seguru intre sas prus delicadas, sa prus importante de sa vida de custos animales.

Pro custu motivu est tutelada dae sa Lege Regionale 29 de trìulas 1998 n. 23, chi punnat a assegurare su mantenimentu de sa biodiversidade, in s’interessu de sa colletividade e de sa comunidade internatzionale. Difatis, discuidende sos casos de predatzione, su impatu negativu majore derivat de s’atzione de s’òmine: dae sos sistemas de pisca, professionale e isportiva a sas addobadas cun sas imbarcatziones e in particulare cun sas èlicas, sena ismentigare s’incuinamentu marinu.

No est sa prima bia chi sa testùine sèberat s’arenile de su Poetu pro fàghere sos cocois. S’ùrtima bia est istadu duos annos a oe, cando  aiat depositadu a pagas chentinas de metros dae su puntu seberadu notesta, in s’oru de un’istabilimentu balneàriu. A pustis de un’atentu e vìgile controllu finas a su momentu de s’aberidura  medas piticas Caretta Caretta aiant pigadu sa bia de su mare.

Intre sos tostoinos marinos presentes in su Mare Mediterràneu, sa Caretta Caretta est sa genia prus difusa e fintzas sa prus pitica. In generale criat a de note. Ogni nidu cuntenet in mèdia una chentina de oos, ma podent arribbare finas a 200. Tenent sa mannaria de una botzitedda de ping-pong e benint collocadas in unu fossu istuvidu  in s’arena. A pustis de las àere tudadas  cun coidadu, sa fèmina las lassat inie e est posca su calore de s’arena a cunsentire s’incubatzione.

Tenende contu de su ‘sèberu’ de sa Caretta Caretta, su Corpu Forestale at provididu a iscostiare, cantu prus pagu  su tempus netzessàriu a s’aberidura de sos oos, sa passerella posta dae pagu  pro megiorare sa mobilidade motòria in su arenile cuartesu. In prus s’àrea interessada dae sa depositzione est istada in manera adeguada acresurada, pro tutelare mègius custu donu bellu de sa natura.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Benito Urgu, unu de sos comigos prus connoschidos e appretziados de sa Sardigna.

Attore, cabarettista e tzelebridade televisiva, in sos annos est divennidu populare meda gratzias a sos ispettaculos ispassiosos suos e a sas friguras chi contant cun iscrombu sa vida de donzi die in s’isula. Naschidu in Aristanis, Urgu at incuminzadu sa carriera sua in su mundu de s’ispettaculu medas annos faghet. Fintzas dae s’incumintzu at leadu supra de su cataffale una comicidade simple e ispontanea, a s’ispissu ispirada a sa manera de faeddare,costumenes e situassiones tipicas de sa Sardigna.

In sos sketch suos contat cun lepiesa sa vida in sas biddas, su connottu e sas iscenas pitticcas de donzi die, iscenas in sas cales medas pessonas resessint a si reconnoschere in manera fatzile. In su mentres de sa carriera longa sua at partetzipadu a medas ispettaculos teatrales, programmas televisivos e in sa radio.

Cun sa manera sua de faghere nadurale e s’humor derettu est resessidu a conchistare su pubbricu de tottu s’isula. Meda de sas friguras suas sunt divennidas connoschidas pro itte presentant in manera chi divertit su meledu e sos comportamentos de sa zente sarda.

Sa comicidade de Benito urgu si fundat supra trempas simples e istorias chi naschent dae sa vida de donzi die. In sos ispettaculos suos faeddat a s’ispissu de sa vida in sas biddas, de su connottu e de su cambiu de sa sotziedade. In medas occasiones impittat fintzas paraulas e maneras de narrere de sa limba sarda, faghinde divennere sas mustradas suas fintzas prus accurtzas a sa cultura e realidade de s’isula.

Cun su colare de sos anno est divennidu unu puntu de relata po sa comicidade in Sardigna. Sos ispettaculos suos sighint a essere sighidos dae medas pessonas e sunt unu mamentu de divertimentu ma fintzas una manera po contare cun iscrombu sa vida e sos cambios de s’iscrocca. In prus de sa comicidade, Benito Urgu at semper mustradu attentzione meda pro sa cultura e su connottu de sa Sardigna.

Pro mesu de su tribagliu suo ad dadu unu contribbudu pro faghere connoschere e balorizzare mamentos importantes de s’identidade de s’isula, battinde supra de su cataffale istorias e situassiones chi faghent parte de sa vida e de sa memoria de sas comunidades locales.

Cun sa forma simple sua, deretta e ispontanea, Benito Urgu at fraigadu una carriera longa in su mundu de s’ispettaculu. Fintzas oe est cussideradu una de sas caras prus connoschidas de sa comicidade sarda e sighit a essere appretziadu dae pessonas de ingendras divressas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22