A pustis de  un’inghesta atenta fata dae sos carabineris subra una sèrie de episòdios criminosos, 16 in totale, tres òmines de Biddamanna Strisàili sunt istados denuntziados cun s’acusa de fura agravada e detentzione illegale de munitziones. Sas atziones fatas dae sos suspetados includent furas, irrobatòrios e minetzas cummìtidas cun s’impreu de armas de fogu.

Sos carabineris de s’istatzione de Biddamanna, paris cun  sas Iscuadrìllias Anticrimine de Àrthana e Lanusè, suta de sa coordinatzione de su Nùcleu Operativu, ant retzidu su suportu pretziosu de sos Cassadores de Sardigna de Abbasanta e de sos cinòfilos durante sos controllos. S’iscumbata at rechertu un’atividade atenta de osservatziones, apostamentos, atzertamentos tècnicos, bisione de sas telecàmeras e su còmpudu de denuntzias e informatziones subra de sos avenimentos.

Comente resurtadu de sas atziones printzipiadas, sas fortzas de s’òrdine ant postu suta secuestru 4 fusiles e una pistola, totus armas chi a comintzu resurtaiant detentas in manera legale. Nointames, est istupadu chi sos propietàrios non respetaiant sas normativas relativas a sa detentzione segura de custas armas. In agiunta, sunt istadas atzapadas munitziones siat de pistola siat de fusile, fintzas custas detentas in manera illegale.

Durante sos atzertamentos, sunt istados iscobertos fintzas sos trastos impreados pro unas cantas furas, comente ismirìllios. Est istadu agatadu peri un’àteru ogetu suspetu: unu cuadru lughe professionale de livellu industriale, fortzis ogetu de fura. In prus, sos incuirentes ant agatadu belle 80 cavos de sa tzentrale elètrica de Biddamanna e guaina isolante, de seguru furadas etotu.

S’operatzione est istada possìbile gràtzias a sa collaboratzione intre diversas unidades de sas fortzas de s’òrdine e dimustrat s’aficu de sas autoridades contra sa delincuèntzia pro garantire sa seguridade de sa comunidade locale. Como tocat a sas autoridades giuditziàrias fàghere àteras iscumbatas e valutare sa positzione de sos tres òmines denuntziados, pro chi potzant rispòndere de sas atziones issoro dae in antis a sa lege.

Sa populatzione de Biddamanna e de sas zonas lacanàrgias podent èssere prus trancuillas pro more ca sas fortzas de s’òrdine sunt vìgiles e atentas pro garantire un’ambiente prus seguru pro totus. S’aùgurat chi atziones de politziaa comente a custa  serbant pro limitare sa delincuèntzia.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

2

Nugoro,un’ambulatoriu novu po s’iscoperta de sa maladia de su tunnel carpale.

Sa setzione de Neurochirurgia de Nugoro at attivadu un’ambulatoriu novu dedicadu a s’iscoperta de sa maladia de su tunnel carpale, una de sas neuropatias pius presentes e chi inbalidant. Su disignu est bistadu possibile gratzias a s’arrivu de unu elettromiografu de urtima ingendra, comporadu cun fundos regionales, chi permittit de faghere esamenes de pretzisione manna supra sa velocidade de condussione motoria e de attibiscione.

S’istrumentu permittit de ottennere datos fidantziosos e lestros, mezzorande sa calidade de s’iscoperta de sa maladia e sa lestresa de s’interventu po la curare.

Donzi mercuris benint fattos otto esamenes cumpletos , cun su mattessi numeru de malaidos. In su mattessi mamentu de sa balutazione de cunfirma,su duttore ispecialista aberguadat si serbit un’operassione. In casu de risposta affirmadiva, su malaidu benit postu derettu in sa lista de sas operassiones, minimande sos tempos de isettu e faghinde divennere pius simple su caminu sanidariu.

Sinitziativa, naschet cun s’intentu de minimare sas listas de isettu non solu po s’iscrocca nugoresa, ma fintzas po tottu su cadinu de su tzentru-nord Sardigna.Su servitziu novu offerrit a sos malaidos una resposta lestra e cualifficada a una maladia isparta, chi si no benit curada, podet cumpromittire in manera importante sa calidade de sa vida.

Intro de s’ambuladoriu est fintzas possibile de iscoperrere atteras maladias chi appisturant su sistema de sos nerbios foranu,comente sas maladias de ingorramentu de su nerbiu ulnare, accreschinde sa possibilidade de l’iscoperrere a sa lestra e de essere controlladu dae s’ispecialista. Sos malaidos si podent accostare a su servitziu prenotande po mesu de su Cup, presentande s’impegnativa de su duttore insoro. Cun custa attvidade nova,sa Neurochirurgia de Nugoro si cunfirmat unu logu de relata po s’assistentzia ispecialistica e su mezzoramentu sanidariu,auninde tennologia avantzada e attentzione bera a sos bisonzos de sos tzittadinos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”