S’opositzione de tzentrumanca in Sardigna est subende unu cambiamentu profundu in bista de sas eletziones regionales de su 2024. Sa novidade pigat inghitzu a s’internu de su Cussìgiu regionale, ue s’est formadu unu grupu nou chi riunit sas fortzas de manca e ambientalistas. Custu agrupamentu polìticu nou, nòdidu comente  ‘Alleanzia Europa Verde Sinistra, Possibile, Articolo1’ o in manera simple Alleanza Rosso-Verde, acollit sos cussigeris Antonio Piu e Diego Loi, bènnidos dae su grupu de sos Progressistas sardos. De cunsighèntzia, su grupu de sos Progressistas s’agatat como cun tres rapresentantes ebbia. S’alleàntzia cumprendet fintzas mòvidos natzionales chi a su presente non sunt presentes in s’Assemblea regionale.

S’obietivu de custu grupu nou est su de andare prus addae de s’alleàntzia istitutzionale chi esistit e dare un’impulsu prus forte a s’opositzione. “Cherimus ispìnghere cun determinatzione contra sa giunta de tzentrudereta ghiada dae Christian Solinas”, ispiegant Diego Loi, fintzas sìndigu de Santa Lussurgiu, e Antonio Piu. “Custa unione at a rapresentare unu puntu firmu in su fàbricu de sas alleàntzias in bista de sas eletziones imbenientes “.

Piu e Loi de Europa Verde s’ant a unire a Maria Laura Orrù de Possibile, Eugenio Lai e Daniele Cocco de Articolo1, ultres a sas adesiones tècnicas de Laura Caddeo (Demos) e Roberto Deriu (Pd). Custu at a giùghere su grupu a tènnere su matessi pesu polìticu de su Partidu Democràticu, cun sete rapresentantes.

“Cherimus sighire su percursu printzipiadu dae sos partidos a livellu natzionale chi sunt traballende subra de sos temas de sa transitzione ecològica e de sos deretos”, ispiegat Maria Laura Orrù, sutaliniende s’eletzione de Francesca Ghirra a sa Càmera de sos Deputados comente esèmpiu de su bonu traballu acumpridu.

Sos foraessidos sutalìniant chi non b’at peruna distàntzia de sos Progressistas, afirmende chi su grupu de sos Progressistas no est unu partidu, ma petzi unu grupu consiliare, e chi sa bisione issoro s’allìniat a su percursu natzionale giai aviadu in su Parlamentu nou.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Casteddu, comintzat su Cossizu Metropolitànu nou: 70 comunes unidos po una comunidade cumpartida.

Su 16 de santuaini, in s’aposentu consiliare de su Palatu Règiu in Casteddu, est istadu fatu s’atopu de insediamentu de su Cossizu Metropolitanu nou, a pustis de sas eletziones chi bi sunt istadas su 29 de su mese coladu. Cust’atopu est su comintzu uffitziale de su mandadu amministrativu nou, a inube sunt andados sos rapresentantes elèzidos dae totu sos logos chi sunt parte de sa Tzitade Metropolitana de Casteddu.

S’atopu est comintzadu cun sas paràulas de su sìndigu metropolitanu Màssimu Zedda, chi at dadu su ben’ènnidos a totus. Posca at dadu a totu sos cossizeris noos carchi cossizu de comente fàghere po su tempus bennidore. Zedda at nadu chi sa punna pius manna de s’imbeniente siat cussa de fàghere una comunidade unida meda e capatze a valorizare sas cosas bellas chi in totu sas biddas bi sunt.

Custa est una de sas cosas chi pius tocat de fàghere, gai de àere mezoros mannos po totu sas biddas, chi sunt 70. Zedda lis at nadu puru chi tocat de afortire s’idea de apartenèntzia a su logu insoro, chi est semper mudande dae oe a cras. E custu tocat de lu fàghere chistionandesi pari- pari e cun sabiore meda. At nadu fintzas chi su Cossizu Metropolitanu est de importu mannu po dare su pesu zustu a totu sas biddas, gai de pòdere crèschere totus in donzi setore.

Su sìndigu at nadu chi tocat de ispalatare sas origas, iscurtande sas dudas e sas lementas de totus, gai de sas biddas mannas e gai e-totu de sas minores. Custu s’at a pòdere fàghere si b’at àere azudu dae parte de sos ufìtzios tènnicos e de chie tribàlliat in su Cossizu Metropolitanu, gai de bi tènnere un’andàina semper bia de novas, de ideas e de proponimentos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22