Oe s’Airone est sa de tres in classìfica e una vitòria li diat garantire sa partetzipatzione a sos Playoff promotzione.
Sàbadu chi benit, a su palatzu Janas de bia de Santa Chiara, sos nieddos-birdes de s’iscuadra Airone, suta sa presidèntzia de sa presidente Franca Lai, ant a afrontare s’iscuadra de Bòrore in una gara importante meda pro su campionadu.

Una vitòria los diat fàghere arribbare a sos Playoff promotzione, cun sa possibilidade de torrare a sos campionados natzionales. S’Airone, chi s’annu coladu at leadu parte a su campionadu de Sèrie B, est faghendesi bàlere meda in su campionadu regionale. Pròpiu pro custu motivu sa presidente Lai at fatu un’apellu a totu sos apassionados de s’isport chi cherent sustentare s’iscuadra in custa disfida importante de sàbadu. S’aficu e sa determinatzione de s’Airone mèritant difatis s’agiudu e su sustegnu de su pùblicu, chi de seguru no at a nòghere pro bìnchere.

Sos pitzocos de s’Airone Tortolì Volley duncas tenent su dovere e s’òbligu de bìnchere contra sa capulista Bòrore e si bolent arribbare a sos Playoff de su campionadu de Sèrie C Maschile.

Custas garas sunt in medas a bisare de las pòdere giogare, garas chi s’assimbìgiant a beras finale ue non si faghent càrculos, e si puntat deretu a su resurtadu e cando arribbant custu est petzi ca tenes un’iscuadra fantàstica cun atletas chi dae 8 meses traballant in palestra e cando arribbat a sa partida de s’istajone no la podent faddire.
Su capitanu Antonio Melis Amus est su coro de s’iscuadra e de seguru at a fàghere de totu pro non dare sa botza a sos atacantes bororesos, chi tenent un’atacu potente a beru. S’importante est a tènnere semper sas ideas craras e a non si fàghere ispantare dae sa fama de sos aversàrios chi podent bantare de àere giogadu unu campionadu ispantosu a beru. Si s’Airone at a bìnchere sàbadu s’at a pensare a sa prima de sos playoff, ma mègius a no bi pensare meda, pro s’ogru malu e pro arribbare preparados a sa partida detzisiva.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Carrelas serradas, proibbissiones de arressada e zuras de su tzentru off limits: Nuogoro si approntat a sa bisita de su Presidente de sa Repubblica.

Nugoro si approntat a accollire su Presidente de sa Repubblica Sergio Mattarella e lu faghet cun d’unu pianu de organizassione mannosu chi prenettat carrelas serradas, proibbissiones de arressada e paritzas zuras de su tzentru de sa tzittade off limits po garantire sicuresa e ordine pubbricu.

Su Capu de s’Istadu est isettadu in s’isula po sos chentu annos de su premiu Nobel de Grassia Deledda, affussione de balore istoricu e culturale istravanadu po sa Sardigna e in manera particulare pro Nugoro.

Su Presidente Mattarella at arribare in Nugoro po intzidire a sas tzelebrassiones uffitziales dedicadas a s’iscrittora nugoresa, unica femina italiana chi at binchidu su Nobel po sa Litteradura. Su programma de sa visita sua prenettat una arressada a su Teatru Eliseo, inube bi at essere unu mamentu istitutzionale tzentrale de sa zoronada, e prus a tardu una bisita a sa domo-museo de Grassia Deledda, logu frigura de sa memoria e s’identidade culturale de sa tzittade.

Isettande s’arrivu de su Capu de s’Istadu, su Comune at preparadu unu pregone chi cambiat sa passada in manera de signifficu. In sas oras prima e in su mentres de sa bisita, bi ant essere proibissiones de arressada in sas carrelas in sas cales at a colare su curteu presidentziale e in sas zuras accanta a su Teatru Eliseo e sa domo- museu. Carchi carrela de su tzentru at essere serrada a su traffigu po carchi mamentu, mentres atteras zuras dislindas ant essere serradas fintzas po sos chi andant a pe po permittere chi sos appuntamentos istitutzionale si pottant faghere in siguresa.

Affortigadas sa mesuras de siguresa cun s’interventu de sa Prefettura, Questura e de sa politzia. Si prenettant controllos,travessas e politzia in sas zuras diligas de sa tzittade. S’intentu est cussu de garantire una bisita sigura,allindande meda sas discumbenias po tzittadinos e mercaderis, chi sunt bistados informados dae tempus de sas modifficas de sa circulassione.

Sa presentzia de Sergio Mattarella est unu mamentu de braga manna pro Nugoro, chi si approntat a tzelebrare una de sas friguas suas prus e importantes. Sa tzittade bivet oras de isettu e fermentu: iscolas,assotzios culturales e istitutziones sunt interessadas a ordiminzare sos abbenimentos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22