Sa segunda editzione de sa mustra regionale de s’àinu de ratza sarda est istada binta dae Bettua de Luigi Agus de Biddesartu (SU) chi est arribadu primu de s’itireddesu Antonio Canu, classificadu paris cun Bonesu e Fortuna a su de duos e a su de tres postos. Organizada dae ANAREAI, AARS, Comunu de Itireddu e Assòtziu Ìpica Itireddesa,  sàbadu 29 e domìniga 30 de abrile, sa mustra est  dedicada fintzas a sas ratzas de caddos e de àinos de sa Sardigna e at tentu fintzas nùmeros positivos. Totu cuntentos peri pro more de sa nàschida durante sa manifestatzione de sa poledda “Itireddesa” de Giuseppe Cotzia de Cùllieri.

Sa manifestatzione est comintzada sàbadu cun sos seminàrios dedicados a sa cura e alimentatzione de s’àinu tentos dae sos dotzentes de su Dipartimentu de Veterinària Eraldo Sanna Passino e Maria Grazia Cappai, subra de sa psicologia de s’àinu de Lisa Mabilia e subra de sa gestione de sos ecuinos chi pascehnt iscapos de Nicolò Lenarda. Su presidente e su diretore de ANAREAI Luca Marcora e Matteo Vasini ant adobiadu imbetzes allevadores e espertos pro chistionare de sa valorizatzione de sas ratzas de caddos e de molentes de sa Sardigna.

A sa mustra sunt andados medas famìlias acumpangiadas dae sos pipios chi, gràtzias a “L’Isola dei Ciucchini”de Suella Antonio Luisi de Uda, ant pòdidu bìvere s’esperièntzia de petenare  ecaignare sos àinos. Bi fiant peri sos bestiolos de Matteo Pilleri de Santu ‘Idu e de Giovannantonio Pilo de Tàtari chi at espostu fintzas sos poleddos biancos de s’Asinara.

Durante sa mustra meda ispàtziu est istadu dadu fintzas a su caddu de su Sarcidanu presente in Itireddu cun sos caddos Ugolino e Osvaldo de Luca Melis de Biddeputzu e a s’ebba Diva de Funtanamela de su Comunu de Làcani, rapresentadu dae su Sìndigu Salvatore Argiolas e dae s’Assessore Giuseppe Coseddu. In particulare, su caddu Osvaldo, chi at partetzipadu dae pagu a Fieracavalli, at allutu s’interessu de sos medas apassionados pro sas particularidades suas. Su Comunu laconesu at in prus at fatu a ischire chi su 24 e su 25 làmpadas at a dedicare a custa ratza  duas dies de mustra.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”