Una fèmina de sos Istados Unidos lassat su telefoneddu a sa fìgia e sutzedet unu “dannu mannu”
Lassat su tzellulare a sa fìgia de 5 annos e s’agatat tres mìgia èuros de adèbitos de Amazon: in sos Istados Unidos una mama at ismentigadu de ativare su blocu e sa pitica at ordinadu una meca de gioghitos. Sa fèmina no at carculadu de tènnere in su tzellulare un’aplicatzione chi permitit de fàghere achistos sena dèvere cunfirmare sas cartas de crèditu. Duncas a pustis de unu pagu de tempus sa fèmina de su Massachusetts s’est agatada in su contu suo un’addèbitu de sas ispesas in lìnia de Amazon. Sa summa? Prus de tres mìgia dòllaros, est a nàrrere  prus de 2700 èuros. E chie aiat fatu cussa ispesa manna?

Sa fìgia, una pitzinna de 5 annos. Sa “vìtima” at contadu su fatu a su giornale “Good Morning Amèrica”, contende chi sa chida colada l’est arribbada sa lista de s’ispesa: moto de cross elètrica, diversas parigas de botas de vacàrgiu e una Jeep de giogu.

“A printzìpiu  apo  pensadu chi si trataret de un’imbrollu, duncas so andada deretu a bìdere sa cronologia de sos òrdines de Amazon e apo iscobertu chi aia ordinadu una sèrie de giogos e mi so ammentada de àere dadu su telèfonu a fìgia mea”. E ancora: “Fìamus ghiende in màchina e issa in s’ora fiat faghende òrdine cun su telèfonu meu. A sa fine non l’apo mancu brigada pro su chi at fatu, pro ite sa neghe est istada sa mia chi l’apo lassadu su telefoneddu sena mi nde segurare chi esseret postu su blocu pro sos minores. Seguru ca custa esperièntzia m’at a serbire pro abèrrere sos ogros e pro donare prus atentu, sende chi cando sos pipios tenent a manìgiu sa tecnologia podet sutzèdere finas cosas pagu bellas. A mie, a contos fatos, est peri andada bene, prus pagu a sa busciaca”.

 “Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Masua, dae sa miniera a su mare: una bidda intre istòria e natura in Sardigna

Masua, ex localidade minerària oe connota pro sas bellesas balneares suas, est a 95 metros subra su livellu de su mare e est fratzione de su comune de Iglèsias, in sa provìntzia de su Sulcis-Iglesiente, in sa sub-regione de su Sulcis-Iglesiente.

Sa fratzione est distante prus o mancu 13 km dae su tzentru de Iglèsias. Custa biddighedda s’acredat a su mare lìmpidu de sa Costa de su Sulcis, dominada dae su faraglione Pan di Zucchero, una formatzione de granitu arta prus de 120 metros chi si àrtziat maestosa a cara a s’ispiàgia. Custa istrutura imponente est diventada su sìmbulu de sa localidade e una meta de non pèrdere pro sos apassionados de fotografia, escursionismu e arrampicada.

Masua cunservat fintzas un’istòria minerària de importu. Sas minieras de prumu e zingu chi unu tempus animaiant sa vida de sa bidda ant lassadu orminas profundas in s’identidade culturale de su territòriu. In su 1882, Gabriele D’Annunzio aiat visitadu sa miniera, incarrigadu de iscrìere un’artìculu pro una rivista. In su resocontu suo, aiat descritu sa cunditzione difìtzile de sos minadores, bortas meda denutridos e custrintos a ritmos de traballu massacrantes, sena trascurare una descritzione atenta de su paisàgiu a inghìriu, chi giai assora faghiat ispantu pro sa bellesa sua agreste.

Oe Masua est una meta balneare famada pro chie chircat unu chigione autènticu de sa Sardigna, a tesu dae su turismu de massa. Sas insenaduras piticas dant s’ocasione pro nadare, fàghere snorkeling o pro si godire su sole e sa trancuillidade. Sos caminos panoràmicos chi cullegant sa bidda a sas minieras antigas, permitint de unire a sa bellesa de su mare s’iscoberta de s’istòria e de sa natura a inghìriu. In sos ùrtimos annos, Masua at comintzadu a isvilupare unu turismu sustenìbile, valorizende s’ambiente e sas traditziones locales. Escursiones guidadas, percursos naturalìsticos e initziativas culturales permitint de vìvere s’essèntzia de su logu sena de nde isnaturare s’identidade.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”