Ses prèmios a su Mediastars, sos ‘Oscar’ de sa publitzidade italiana. At otentu unu resurtadu importante s’annùntziu publitzitàriu “Sardgna, un mondo straordinario”, promòvidu dae sa presidèntzia de sa Regione.
Sa premiatzione, lòmpida a sa de 27 editzione, at a èssere fata su 9 de mese de làmpadas in Milanu.
Su vìdeu at otentu su primu postu in sa categoria Retes sotziales – Annùntzios publitzitàrios Istitutzionales, s’istella ispetziale pro sa Diretzione Creativa, su segundu postu in sa categoria Televisione – Annùntzios publitzitàrios Istitutzionales, s’istella ispetziale pro sa règia e sa colunna sonora e in fines sa nominatzione in s’elencu curtzu (Short list).

In s’annùmntziu si biet unu mamutzone chi paret unu pessonàgiu marinu, chi arribat a s’Ìsula: suta sa fatzola b’est una fèmina, Caterina Murino, atoressa e testimòngiu de sa Sardigna in su mundu.

  A acumpangiare su mamutzone in su biàgiu suo b’at unu gigante de Mont’e Prama: in su vìdeu de pagos segundos sunt medas sos riferimentos a sos nuraghes, a sas marinas, a sos padentes, a sos costùmenes, e a sos tzentenàrios de Sardigna. Ammajos chi acumpàngiant s’ispetadore in una narratzione chi colat dae sa fantasia a sa realidade, in ue a s’agabbu de s’annùntziu, una mama leghet a sa fìgia unu contu istraordinàriu ispantosu de s’Ìsula.
    S’annùntziu publitzitàriu, at naradu sa Regione in unu comunicadu, est contribuende “a promòvere sa Sardigna in sas logos turìsticos internatzionales prus importantes, a su presente est in distributzione in sas retes sotziales e in sas emitentes televisivas printzipales de su mercadu americanu e europeu, comente in sa Cnn e in sa Bbc”.
“S’annùntziu publitzitàriu contat una Sardigna bera, cudda capatza de incantare sos turistas gràtzias a sas bellesas paesagìsticas suas e a sa cultura millenària, contadas in su vìdeu de 90 segundos”.

    Sa regia est de Manuele Trullu, sa produtzione de Andrea Iannelli, sa diretzione creativa de Massimo Moi, sa fotografia de Francesco Piras, sas mùsicas de Flavio Ibba.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22