Bill Gates in s’ùrtimu investimentu mannu cosa sua at detzisu de puntare totu in sa birra. Ma non una cale si siat, ma in sa birra sìmbulu de sa Sarsigna, s’Ichnusa. Difatis su fundadore de Microsoft  at comporadu su 3,8% de sa sotziedade Heineken Holding pro prus de  902 milliones de dòllaros. Si tratat duncas de un’investimentu importante meda. Su fatu est essidu a campu gràtzias su documentu depositadu in sa sede de s’autoridade olandesa pro sos mercados finantziàrios.

Bill Gates at achistadu 6,65 milliones de atziones a tìtulu personale e  àteros 4,18 milliones cun su Bill & Melinda Gates Foundation Fund. Sa Heineken at fatu medas investimentos in Itàlia, difatis, a banda sa birra cun sos Bator Moros, est mere fintzas de Moretti, Dreher e Messina. In prus tenet àteras birras famadas comente s’olandesa Amstel, s’irlandesa Murphy’s e sa messicana Sol.

Sa birra Ichnusa, gràtzias a una campagna publitzitària importante meda, est essida dae sas làcanas de sa Sardigna e de s’Itàlia, balangende meda tretu in su mercadu internatzionale. Como est fàtzile a l’agatare fintzas in GErmània e in Ispagna, fortzis peri gràtzias a sa presèntzia de medas disterrados sardos. In Itàlia in sos annos colados ddoe istada una campagna de promotzione importante pro sa birra non filtrada” e ocannu s’azienda cun s’istabilimentu in Assèmini at promòvidu sa “Ambra lìmpida”, chi est istada lantzada fintzas in Olanda e in sos Istados Unidos.

Cun s’investimentu de Gates est possìbile chi sa birra si fatzas connòschere meda fintzas in Usa. Sa cosa ispantosa est chi su miliardàriu americanu at naradu de no èssere un’amantiosu de sa birra, però cando s’agatat in ocasione particulares comente una partida de baseball at naradu de bufare calicuna birra su matessi, pro fàghere cumpangia a sos cumpàngios. Chissai chi cun s’acuisitzione de atziones de sa bidda cun sos Bator Moros non cambiet idea!

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Sa birra sarda sighit a si distinghere a livellu natzionale e europeu, accuccurrande una filera de riconnoschimentos de grandesa chi ponent in lughe s’estremadia de su prodottu isolanu e sa solidesa de sa filera regionale de sa birra. Custos premios cunfirmant su sutzessu creschente de sas favricas artigianales de sa birra in Sardigna e s’effettu de signifficu supra su mercadu regionale e addia.

Dae pagu tempus, sas favricas de birra isulanas ant brilladu in medas manifestatzione importantes, incluinde abbenimentos meda connoschidos commente su Vinitaly 2024 e su Bartzellona Beer Challenge, unu de sos cuncursos de sa birra pius de grandesa de Europa, addia a su Cuncursu Internatzionale de Lione.

In mesu de sos personaggios printzipales de custa serie de sutzessos, si est annoddittada sa favrica de birra Puddu de Santa Giusta,Aristanis, chi at conchistadu tres medallas (oro,arghentu e brunzu) a su Bartzellona Beer Challenge po sas variedades Porter,Saison e Coffee Porter, binchinde puru su titulu de menzus favrica de birra zovana de sa gara. Sa favrica de birra Battor Moros de Guspini, at binchidu duos oros po sas birras Puttu 16 Helles e Puttu 9 Vienna Lager, e sa favrica Artigiana Horo de Sedilo at retzidu una medalla de oro po sa Tifo Mourinho e una de arghentu. Puru sa favrica de birra Agricola Reforte de Benetutti at binchidu una medalla de brunzu cun sa birra Su Boboti, e sa favrica de Birra Keja de Bari Sardo at conchistadu una medalla de arghentu cun sa Calmedia, un’India Pale
Lager.

A su cuncursu internatzionale de Lione, sa favrica Birrificio “Isula” de Thiesi at binchidu medas medallas de oro po medas variedades, in mesu de sas cales sa Pale Ale, sa coffee stout e sa pils, addia una medalla de arghentu cun sa Session Ipa. In pius a su Vinitaly, su premiu “silver” a su design po sa classe birras, est bistadu dadu a sa Wine Explosion – IGA Mogorese a su Semidano favrica de birra Bam de Mogoro.

Su presidente e su direttore de Coldiretti Sardigna, Battista Cualbu e Luca Saba, ant evidentziadu s’importantzia de custos riconnoschimentos, chi premiant su tribagliu tostu de sas favricas de birra artigianales de sa Sardigna in s’agguantare tottu sa filera de sa birra regionale. Coldiretti Sardigna at fattu partire unu disignu ambitziosu meda po azzuare custa filera, faghinde partetzipare sos chi produene su ranu,s’orzu,malto e luppulu, paris cun sas favricas de birra e su Consorziu de sa Birra Italiana.

Custu disignu cheret favoressere una produssione de s’isula cumpleta, dae sas materias primas a su prodottu finidu, cun s’intentu de rispondere a tottu sas esigentzias de sa filera. Gratzias a custa initziativa, sunt arrivados finatziamentos importantes meda dae sa Regione, po agguantare sas favricas de birra a sos produttores de orzu, preparande su terrinu po accomettare sas porfias de su tempus benidore cun ressignu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22