Lusisetta Mercalli est sa prus betza de Casteddu. Difatis est nàschida in su 1915 a Carloforte 108 annos a su 17 de friargiu. Pro more de custu traguardu importante, festadu in s’istrutura  RSA de Su Planu, s’amministratzione comunale l’at bòlida bisitare e annovare a nùmene de totu sa tzitadinàntzia. A li fàghere bisita est andadu su Presidente de su Cussìgiu Comunale Edoardo Tocco, chi l’at donadu sos augùrios de persone. Gràtzias a custu traguardu immoe Luisetta est sa persone prus manna Casteddu.

Pro ammentare custa die gosi importante pro issa e pro sa tzitade de Casteddu, s’amministratzione comunale l’at integradu una pergamena una medàllia tzelebrativa a nùmene de su sìndigu Paolo Truzzu e de totu sa giunta e cussìgiu comunale.

Chentu e oto annos sunt medas de a beru. Pròpiu pro custu motivu sa lòmpia de custu traguardu est istada chircada fintzas dae sos giornales e dae sas televisiones natzionales chi l’ant dedicadu artìculos e servìtzios chi ant fatu su giru de su mundu. Si tratat difatis de una die de festa non solu pro issa, chi mancari totu sas dificultades e patimentos est resèssida a arribbare a custa edade, ma fintzas pro Casteddu e pro sa Sardigna, chi si torrat a cunfirmare logu de tzentenàrios.

Fìgia de Piergiorgio Mercalli e Limbania Rivano, Luisetta at connotu sa gherra manna e sa segunda gherra mundiale. Posca at connotu sa pidèmina de s’ispagnola, chi fintzas in Sardigna at mortu gente meda. E in prus, in su 2020, at fintzas superadu su Covid.  A pustis de su diploma leadu a Pàdua in s’Iscola feminile de at comintzadu a insegnare pro primu in s’Aviamentu Professionale mùsica e càntigu corale e posca economia domèstica. Finas a su 1979 at insegnadu in s’Iscola Mèdia Alfieri. Cojuada cun Luigi Quaquero, at tentu duas fìgias, Angela Maria e Myriam, chi l’ant donadu tres bellas netas.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”