Est giai in sas librerias su romanzu, “Il dolore crea l’inverno”, de s’autore Matteo Porru. Su libru nou cosa sua, publicadu dae Garzanti, faeddat de Elia Legaosv, naschidu in una bidda semper niadu e inghiriadu dae sa biancura e de su nie. Dae custa bidda Elia non si nde fiat mai iscostiadu. Comente traballu faghet pròpiu cussu de apangare sa nie chi preniat sos caminos e sas àndalas de du bidditzolu.

Sende chi dae cando fiat minore issu aiat bìvidu semper in mesu a sa nie, pro issu custu elementu fiat familiare e lu bidiat comente un’amiga, finas a cando però non benit traìghidu dae issa.

Su nie est sua amiga, finas a cando no lu traighet faghende essire a campu calicuna cosa chi finas a tando fiat abarrada tudada e interrada, una cosa chi pertocat pròpiu sa famìlia sua. Dae tando sa conca sua si prenet de ammentos e pensamentos chi issu aiat cuerradu. Regordos de su babbu mortu medas annos a in antis, de sa mama chi si nde fiat andada dae domo. Pro isse sunt ammentos graes, tostados comente s’astra chi non si podet segare. Unu dolore chi li tocat purpa e ossos. Issu però non bolet sighire a poderare custos ammentos tudados e atacados sut sa nie. Est arribbadu pro Elia si momentu de ammentare e de fàghere sos contos cun su tempus coladu suo, mancari a unu prètziu caru meda.

Matteo Porru, classe 2001, at bintu in su 2019 sa setzione Giòvanos de su Prèmiu Campiello. Su babbu est sardu e sa mama venetziana. Cumentzat a iscrìere dae minore e pùblicat unos cantos conto in lìnia. S’esòrdiu est cun su libru The mission, a 16 annos ebbia. Su libru otenet una mentzione ispetziale in su Prèmiu Costa Smeralda. In su  2018 essit su segundu romanzu cosa sua, Quando sarai grande, e s’annu sighente Madre ombra, cun su cale otenet su Prèmiu Zingarelli e lompet in finale a su Prèmiu Cambosu e a su Prèmiu Alziator. In su 2019 binchet su Prèmiu Campiello in sa setzione Giòvanos cun su libru Talismani.

Est essidu in medas trasmissiones televisivas e iscriet pro su tzìnema e pro su teatru, in prus est editorialista pro La Nuova Sardegna, Il Tirreno, La Gazzetta di Modena, La Gazzetta di Reggio e La Nuova Ferrara.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22