In Sardigna est lòmpida una niada manna a beru.

Totu su logu est ispantosu e a sa gente ddi praghet a amachiadura, in medas sunt carrighende fotografias e vìdeos de sa nie in is canales sotziales prus famados

Ph: Genna ‘e Ua – Gàiru – (Cristian Mascia)

Seguru custa niada est serbida a su sartu e pro parare fronte a s’isciuttore de custa istjone, a ue at próidu pagu e nudda, e custa est una cosa de importu mannu a beru pro is meses benentes. At a bastare a regordare chi is digas fiant bóidas medas e sa Regione fiat oriolada pro s’istade de ocannu.

Però in custas oras, medas biddas de monte de su tzentru Sardigna ant àpidu anneos cun sa lìnea èletrica e cussa telefónica. Dìfatis, pro more de sa nie sunt falados a terra is palos telefònicos e de sa currente, e sa gente est abarrada sena de lughe in domo e sena possibilidade de comunicare.

Pro is chi traballant in su sartu, pensamus a is pastores, at a èssere istragosu meda lòmpere a cuile pro atèndere su bestiàmene. Is àndalas sunt prenas de nie e mancari is màchinas mannas de oe sunt fatas a posta pro custas ocasiones, pastores meda sunt abarrados a corcare in cuile.

Pro more de sa niada manna is pompieres ant fatu medas interventos in is biddas e in su monte. In unu de custos, is Vìgiles de su Fogu ant sarbadu is pegòs chi fiant cungiados in una istadda chi nde ddi fiat falada sa crobeta, in su sartu de Tonara. A dolu mannu no ant pódidu fàghere nudda pro un’àinu chi est istadu agatadu giai mortu.

Fintzas pro custu coa de chida at a sighire a fàghere tempus malu.  Dae cussu chi s’ischit ant a lòmpere àteras niadas mannas, a comintzare dae notesta.

In prus de s’àteru, comente lòmpet su fritu, ddu est unàteru perìgulu mannu: s’astra. Pro cussu is màchinas mundanie de s’Anas sunt traballende dae sa note colada, pro libertare is caminos.

Amus a bìdere ite at a capitare in custas dies  in Sardigna.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Su Casteddu, a pustis de sa vitòria contra su Como, sàbadu coladu, in sa giorronada benente at a chircare àteros 3 puntos foras de domo, contra su Cittadella, in s’istàdiu Piercesare Tombolato.

Seguru at a èssere una partida istragosa pro is òmines de Ranieri, pro ite is vènetos ant bìnchidu s’ùrtima gara contra su Pisa, una de is iscuadras prus balentes de su campionadu, cun su resurtadu de 1 a 2 a s’Arena Garibaldi.

Pro is òmines de Ranieri at èssere importante sighire s’àndala cumentzada in custu 2023, pro regalare un’àtera bella satisfatzione a is tifosos sardos, comente sa gara a s’Unipol Domus contra is lombardos.

Is sardos ant a a afrontare is vènetos sena s’atacante Pavoletti, chi at marcadu sa prima rete in sa vitòria contra su Como, e is àteros infortunados: Mancosu, Obert e Deiola.

Galu non s’ischit chi is casteddajos ant giogare cun s’ischema bator-bator-duos o imbetzes o cun su tres-chimbe-duos, comente in s’ùrtima partida. Amus a bìdere, ma seguramente a in antis, in atacu, sa còpia at a èssere Lapadula e Luvumbu. Pro àteru sa formatzione non diat dèpere cambiare meda in cumparàntzia cun s’ùrtima disfida.

In custas dies, Ranieri at chircadu dae fàghere cumprèndere a s’iscuadra s’importu mannu chi tenet custa partida. Difatis contra su Cittadella is sardos s’ant a dèpere impinnare meda, mustrende torra unu bellu giogu de iscuadra.

In medas sunt cumbintos chi ant a lòmpere àteros giogadores pro afortiare su Casteddu. In tzitade s’est bidu su tzentrucampista Nainggolan, ma no est seguru chi su belgu at a torrare a giogare un’àtera borta cun is sardos. Fortzis at a lòmpere su defensore Chiriches chi pro immoe est tesseradu cun sa Cremonese, in càmbiu de Goldaniga.

Pro immoe su tzentrucampista Pereiro at saludadu sa Sardigna e su Casteddu e at  móvidu in a Uruguay pro acabbare dae giogare custa istajone cun su Nacional Montevideo.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”