Cras in Roma ddoe at a èssere s’interru de Gina Lollobrigida.

Sa tzerimònia at a cumentzare a ora de is 12.30 in Roma, in sa Crèsia de is Artistas, in pratza de su Pòpulu.

Pro s’atoressa morta a s’edade de 95 annos est istada aprontadu un’aposentu mortuàriu in sa Sala de sa Protomoteca in Campidògliu, e dae inoghe oe su baullu at a èssere carradu a sa basìlica.

S’istella de su tzìnema, comente aiat dispostu issa etotu, at a èssere interrada in sa bidda nadia sua, a Subiaco, acanta fiat nàschida in su 1927. Su comunu dd’at dedicadu una tumba monumentale, chi però no est galu pronta. Duncas pro s’ora at a èssere posta a s’internu de unu lòculu comunale, comente at decraradu su sìndigu Petrini.

In prus in consìgiu comunale at a èssere proposta s’intitulatzione de una pratza, a presu de su teatru tzitadinu, acanta aiat cumentzadu a resare.

Gina Lollobrigida est istada un’icona de su Tzìnema a livellu mundiale, bastas a pensare chi in 80 annos de carriera at resadu in prus de 60 pellìculas. At retzidu 7 David de Donatello, unu Golden Globe, 2 Nastros de Prata. Su nùmene suo est intre is istella de s’Hollwyood Walk of Fame de Los Angeles.

At a restare una de is atoressas prus amadas de semper, in sa carriera sua est istada dirìgida dae registas de cabbale comente De Sica, Monicelli, Germi e Soldati.

De seguru su film chi dd’at fata istimare de prus dae su pùblicu est istadu: “Pane, amore e fantasia”, in ue Lollobrigida interpretat “sa bersagliera”, una pitzoca chi aiat fatu ammachiare su maresciallu de is carabineris de Sorrento, Vittorio De Sica, dae pagu trasferidu a Abrutzu. S’òpera mastra aiat fatu unu milliardu e mesu de incassos. Pro more de sa resolutesa de s’atoressa, sìmile a cussa de sa protagonista de su film, su nomìngiu “bersagliera” ddi fiat abarradu a totu sa vida.

Lollobrogida, giai provada dae sa pelea legale cun su fìgiu, in cabudanni fiat istada ricoverada in s’ispidale pro àere segadu su fèmore, e dae tando no est prus torrada in transa.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

A pustis de 30 annos a sa mata est istadu arrestadu su capu Matteo Messina Denaro.

Sos carabineris de su Ros Su ant atzapadu su delincuente prus chircadu in Itàlia dae sa giustìtzia italiana, gràtzias a unu traballu longu coordinadu dae sa procura.

S’òmine de sa bidda de Castelvetrano, est istadu arrestadu eris a mangianu cando fiat isetende sa muda sua pro sa chemioterapia in s’istrutura ospedaliera Maddalena de Palermo.

A pustis, in sa caserma Dalla Chiesa, sede de sa Legione de is Carabineris, su procuradore de Palermo, Maurizio De Lucia, – chi at coordinadu s’inchiesta – e su generale de su Ros Pasquale Angelosanto ant fatu una cunferèntzia de imprenta pro ispiegare comente sunt lòmpidos a s’arrestu de su capu mafiosu. Foras de sa caserma at acudidu una surra de gente aplaudende is òmines de s’arma e aboghinende su nòmene de su giùighe Giovanni Falcone, ochidu in s’ochidòrgiu de Capaci.

A su chi s’ischit, Messina Denaro est istadu arrestadu gràtzias a un’istrategia sientìfica de isulamentu, seghende is raportos cun totus sos favoressidores e unu controllu a sa minuda de is intertzetatziones, finas a arribbare a sa clìnica acanta fiat in cura.

Su capu-màfia, a pustis de èssere istadu arrestadu, est istadu tramudadu a una localidade segreta e dae in cue at a èssere inserradu in unu càrtzere de màssima seguridade, comente fiat giai capitadu cun Riina e Provenzano.

Messina Denaro est istadu cundennadu a s’ergàstulu pro deghinas de mortes, comente cussa de su pitzocheddu Giuseppe Di Matteo, fìgiu de su pentidu, chi fiat istadu allupadu e isòrvidu in s’àtzidu a pustis de sa presonia, pro pro is istrages de su ’92 acanta fiant istados mortos is giùighes Falcone e Borsellino, e pro sos atentados de su ’93 a Milano, Firenze e Roma.

Significativa sa cointzidèntzia de s’arrestu de Messina Denaro cun cussu de Riina, acontèssidu pròpiu 30 annos a oe. Unu àteru corfu importante contra “Cosa Nostra”, mancari in custos deghènnios siat cambiada meda. Comente ant sutaliniadu is espertos tando si trataiat de un’organizatzione criminale sanguinària, ghiada dae su capu corleonesu, mentras su cabu trapanesu est istadu capatzu de dda mudare in un’assòtziu impresariale cun raportos istrintos cun s’econòmia e sa polìtica natzionale.

Immoe, cun s’atzapa de Messina Denaro, est Attilio Cubeddu su prus chircadu dae sa giustìtzia italiana.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”