Tragèdia custu mangianu, pagu prima de sas 9, in Gàiru, acanta unu pensionadu de 72 annos, Bruno Scattu, est mortu istrecadu dae unu cantzellu in bia Preda Longa. Su personale mèdicu de su 118, lòmpidu in deretura acantu est sutzèdidu s’intzidente cun un’ambulantza, no at pòdidu fàghere àteru chi cunstatare su detzessu de s’òmine. Su pensionadu digatis est mortu pro tràuma crànicu causadu dae su cantzellu iscurrevole.

Dae Casteddu fiat fintzas partidu un’elicòteru de s’Areus, cun sos mèigos de su 118 chi a pustis de sa noa de su detzessu est torradu a sa base sua. In sa domo de bia Perda Longa sunt arribbados fintzas sos Carabineris, chi ant fatu totu sas indàgines e leadu sos rilevamentos pro acrarire sa dinàmica de s’intzidente.

S’operaju gairesu est istadu ammentadu fintzas de su primu tzitadinu de sa bidda de sa Badde de su Pardu Sergio Lorrai: “Meda disgràtzias e lutos medas nos ant corpidu in custu 2022. Oe nos lassat Bruno, in modu tràgicu. Sa bighinàntzia  mea e nostra a sos familiares e a sos amigos. Nos devimus fàghere fortza, comente aComunidade, nde tenimus bisòngiu.

Custu tipu de intzidentes si repitent cun meda frecuèntzia e sunt causados dae cantzellos montados male meda, cun meda giogu, sena blocos de seguridade opuru modificados o lassados sena manutentzione a nche los papare sa ruina. In base a una reghente chirca de setore  subra de su tema de sas “automatziones” s’est iscobertu che in sos condomìnios italianos sunt prusaprestu preocupantes sos nùmeros relativos a sos intzidentes causados dae sos cantzellos automàticos e manuales.

Bastat intèndere sos telegiornales o lèghere calicunu cuotidianu pro s’abbigiare chi su fenòmenu est in crèschida. Difatis, si registrant semper prus intzidentes causados dae sos cantzellos automàticos. Serbit prus manutentzione e prus controllos. Ma ite narat sa lege? Oramai de calicunu annu (1996) cantzellos e portales automàticos, segundu da diretiva europea 98/37/CE (ex 89/392/CEE) est a nàrrere sa gasi narada “Diretiva Màchinas” acollida in Itàlia cun su DPR N°459 de su 1996, narat chi automatizare unu cantzellu non significat prus “aplicare unu motore”, ma creare una “màchina”. Su “produtore” tenet sa cumpleta responsabilidade e devet realizare una màchina segura; su propietàriu depet impreare sa màchina cun totu sas precautziones, comente  prescrìvidu in su librete de sos inditos, e sighire sa mantenidura.

“Progetu finantziadu cun s’Avisu Pùblicu IMPRENTAS annualidade 2021-2022”

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22