Fèminas 2022, Caterina Murino e Mariangela Pira premiadas fintzas suor Maria Mastinu e Eleonora Meloni
Sas oto Fèminas de ocannu comente a semper sunt oto fèminas de sas istòrias significativas, fatas de medas sacrifìtzios, esèmpios e precursores pro medas collegas issoro o giòvanas chi aspirant a printzipiare cuddu tipu de carriera.
Sunt oto sas fèminas sardas Fèminas 2022. Las at incoronadas eris a mangianu a Donigala Fenughedu, in s’iscenàriu de su Ros’e Mari Farm & Greenhouse Coldiretti Donne Impresa Sardegna chi pro su de ses annos at pessadu e promòvidu su prèmiu de sas fèminas sardas pro sas fèminas sardas. Unu prèmiu in categorias riservadu a chie si distinghet in su campu suo de traballu ma non cussu ebbia, in ue a s’ispissu si podent agatare istòrias importantes disconnotas a su pùblicu ma chi dant meda a sa sotziedade.
Sas oto Fèminas de ocannu comente a semper sunt oto fèminas de sas istòrias significativas, fatas de medas sacrifìtzios, esèmpios e precursores pro medas collegas issoro o giòvanas chi aspirant a printzipiare cuddu tipu de carriera.
Sunt modella e atoressa Caterina Murino, cara connota meda in totu su mundu e ligada a sa terra sua in sa categoria Cultura; sa categoria Agricoltura est andada a unu monumentu de su tzentru Sardigna, de su Mandrolisai e de sa Barbàgia, Cesarina Marcello, 86 annos, faru de su movimentu Pensionados de Coldiretti. Fèmina chi at semper ischidu acrobare bratzos e mente rapresentende un’esèmpiu siat in sartu chi in sas istitutziones. Est istada sindaca de su Comunu de Tiana, chi at dadu sos nadales fintzas a Antonio Todde chi cun sos 112 annos suos in su 2001, fiat intradu a su guinness de sos primados comente òmine prus betzu de su mundu. E est fintzas sa prima agro-panificadora de su territòriu suo; sa prus giòvana Fèminas est istada premiada in sa categoria Isport, Eleonora Meloni 20 annos de Uras, campionessa europea 2021 in s’arcu nudu junior, in ue at conchistadu fintzas su brunzu a iscuadras. Tesserada pro sos Arcieris Uras, dae annos faghet parte de sa natzionale italiana. Sa categoria Ispetàculu est andada a un’icona de sa mùsica sarda, Maria Luisa Congiu de Ulìana. Naschida e bìvida in Roma finas a a degheoto annos est istada conchistada dae s’amore pro sa Sardigna chi contat cun sas cantzones suas in sos palcos de totu sa Sardigna e non solu.
Sa giornalista Mariangela Pira de Durgali est istada premiada in sa categoria Informatzione. Giornalista bagamundu chi in diversos istados in redatzione e comente imbiada e cun sas prus importantes testadas giornalìsticas, Ansa, Mediaset, La7 e Sky. Esperta de Tzina e de Istràngiu est una de sas giornalistas de economia prus apretziadas in cantu resesset a fàghere cumprèndere a totus sas temàticas finantziàrias prus cumplessas. Fèminas de sa categoria Istitutziones est Paola Dessì, fèmina de sas istitutziones, a su presente Prefeta de Sàssari, sa prima fèmina a cobèrrere custu ruolu in Sardigna. Saturnina Tanda de Sàssari est istada imbetzes premiada in sa categoria Iscièntzias. In su 1976 aberit sa potecaria sua in bia Leoncavallo, in su bighinadu santa Maria de Pisa devènnidu posca su Bronx de su tzentru Turritanu. Sa sua no est mai istada una simpre potecaria ma unu presìdiu sotziale in ue non si dant solu sas meighinas ma fintzas carignos e amparu a sas famìlias medas chi pòbulant su bighinadu. Sa categoria sotziale at imbetzes premiadu Suor Maria Mastinu, de Miris cun sa missione de istare acanta a sos pipios chi bivent in su discumbèniu e situatziones estremas. Dae 18 annos s’agatat in Palestina in ue dirighet s’asilu de sa Santa Famìlia de Betlem, s’istitutu de sas Fìgias de sa Caridade de San Vincenzo de’ Paoli chi acasàgiat minores abbandonados e in situatziones de discumbèniu sotziale e de dificultade.
“Progetu finantziadu cun s’Avisu Pùblicu IMPRENTAS annualidade 2021-202
© RIPRODUZIONE RISERVATA