Adiosu a s’isteddu de Hollywood, Angela Lansbury, sa Jessica Fletcher de su Sa Sennora in Grogu (Signora in giallo). Est morta a 96 annos, chimbe dies pustis de àere lòmpidu 97 annos,  in sa domo sua de Los Angeles. A dare noa est sa famìlia: “Sos fìgios de Dame Angela Lansbury sunt tristos in s’annuntziare chi sa mama est morta in su sonnu in domo sua”.

In sa carriera sua, chi l’at bida reina de su tzìnema e de su teatru, at conchistadu chimbe Tony Award, intre sos cales unu in su 1966 pro “Mame” e posca ancora in su 2009, a 83 annos, pro “BlitheSpirit”. At bintu un’Oscar a sa carriera in su 2014. S’imbucada sua a Broadway est de su 1957 cun “Hotel Paradisu”.

Nàschida in Bretagna Manna dae mama irlandesa su 16 de ladàmine de su 1925, Lansbury si fiat fuida dae s’Inghilterra durante sa gherra e a 17 annos ebbia si fiat dedicada su musical, mentras a 19 annos fiat giai suta cuntratu cun sa Mgm a Hollywood a pustis de àere esordidu un’annu in antis in su thriller “Gaslight”.

Connota in totu su mundu pro s’interpretatzione sua de sa sennora Fletcher, iscritora e investiga dora infallìbile bestida cun su tailleur e buscata, Lansbury est istada protagonista d àteras produtziones importantes meda. Est istada sa domèstica mala chi in Amargura turmentat Ingrid Bergman, est istada sa sorre majore de sa giòvana Liz Taylor in Gran Premio, sa protagonista sena coro de su thriller Va’ e uccidi.

Nointames siat devènnida icona de su tzìnema americanu, sa sua Bretagna Manna non s’est mai ismentigada de issa. Elisabeta II etotu l’at onorada de su tìtulu de Dama de sa Reina. Non fiat una cara de cobertina – a s’ispissu li beniant afidados ruolos de fèmina madura – ma cun talentu, coràgiu e determinu s’est costruida una carriera bella a su costàgiu de sos mègius registas e atores de su momentu, e cun s’abbistesa sua, cando su tzìnema la reteniat non prus adata, aiat agatadu su filone giustu in sa televisione, cunsagrende·si a livellu mundiale.

“Progetto finanziato con l’Avviso Pubblico IMPRENTAS annualità 2021-2022”

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22