S’eletzione de Umberto Bossi faghet pèrdere unu parlamentare a sa Sardigna. Oe su contègiu nou fatu dae su Viminale at ammìtidu in parlamentu su senatur lumbardu, chi in printzìpiu pariat èssere foras de s’assemblea. Bossi est in su Parlamentu italianu dae 35 annos. Ma totu custu at cumportadu unas cantas cunseguèntzias prus che totu a dannu de sa Sardigna, bidu chi s’eletzione de Bossi at fatu lassinare in giosso a Alessandra Todde, vitzeministru in su Mise.

Sa noa est istada fata ischire dae  su Dipartimentu pro sos afares internet e territoriales de su Ministeru de s’Internu.  Pagos minutos in antis, su vitzepresidente de su Senadu Roberto Calderoli aiat signaladu un’errore de càrculu chi, si curregidu, diat àere torradu a fàghere intrare in Parlamentu su “Senatur”.

Duncas sa Sardigna tenet una parlamentare de mancu. Cun su contègiu nou de sas ischedas eletorales fata dae  su Ministeru de s’Internu est istada evitada s’essida de su Parlamentu (a pustis de 35 annos) de su senadore de sa Lega Umberto Bossi. Bidu chi  su senatur fiat candidadu in su collègiu plurinominale de Varese, s’eletzione sua nche at bogadu sa vitze ministra nugoresa Alessandra Todde, chi diat èssere dèvida intrare etotu dae cuddu collègiu liberende su postu suo in su collègiu de sa Sardigna acanta fiat capolista.

In pagos faeddos ande  fàghere sas ispesas de s’eletzione de Bossi at a èssere sa collega pentastellata Susanna Cherchi, chi diat àere dèvidu pigare su postu lassadu lìberu dae Todde, e duncas abarrat foras dae  Montecitorio.

Giai lunis sero bi fiat istadu unu corfu de iscena in Sardigna, cun su sorpassu a manca de Romina Mura, deputada in essida de su Partidu Democràticu, dae banda de Francesca Ghirra, unu disafiu a su finale a favore de sa cussigera comunale esponente de s’alleàntzia tra Sinistra- Verdi.

Cosa chi podent capitare cando sos votos e son contègiios non sunt galu concruidos. Est istadu su Viminale etotu a comunicare chi  s’ufitzialidade subra de sos elettos s’at a tènnere petzi cun su timbru de s’ufìtziu eletorale de sa Cassatzione.

 “Progetto finanziato con l’Avviso Pubblico IMPRENTAS annualità 2021-2022″

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22