Emiliana Scarpa, at bintu su primu Trofeu Memorial “Rodolfo Sorbillo “, organizadu dae Luciano Sorbillo, fìgiu de sa bonànima de su maistru pitzajolu napuletanu e de s’assòtziu Promotzione Sotziale impastadores Italianos.

Sa gara intre sos coghineris pitzajolos de totu Itàlia s’est tenta a Nàpule, a Villa Imperiale, Marechiaro. Emiliana Scarpa at triunfadu cun sa “Queen Elizabeth”, omàgiu a sa Reina Elisabeta: una pitza arrichida cun ingredientes de sa terra sua: culurgiones de s’impastu a su nieddu de sèpia, cun scàndulas de botarga, fògias de oro e crema Parmentier a s’annitze isteddadu.

Sa sarda aiat giai conchistadu su segundu posu a sos mundiales de pitza a iscuadras in Palermu, cun in giuria: Antonio Starita, Carolina Sorbillo, Alvise Cagnazzo, Nino Docimo, Iris Mancu e Carlo Migliaccio.

Sa Presidente de sa Cummissione Consiliare Uguales Oportunidade de su Comunu de Casteddu, Stefania Loi, at acollire sa coghinera  a sa torrada sua dae Posillipo.

Intre sas chimbe presentadas in sa cumpetitzione, a èssere notada de prus est istada sa “Queen Elisabeth, creada in regordu de sa Reina britànnica bènnida a mancare dae pagas die, chi at permìtidu a Emiliana Scarpa de si nde leare a  domo su tìtulu finale e àteros duos trofeos de sa manifestatzione.

“Pro sa tzitade de Casteddu e pro s’amministratzione Nostra – su cummentu de Stefania Loi – est unu motivu de grandu orgòlliu  sustentare un’ambasciadora  comente a Emiliana Scarpa. Resèssidas  comente a custa nos permitent de nche projetare a livellu non petzi natzionale ma mescamente internatzionale”.

A fàghere sa diferèntzia in su cuncursu de coghina famadu est istadu su mescuritzu intre sa pitza e sos ingredientes tìpicos de sa Sardigna. Su ligàmine perfetu at cumbintu sa giuria chi at incoronadu sa pitzajola casteddaja comente  sa legìtima binchidora de sa cumpetitzione.

“Progetto finanziato con l’Avviso Pubblico IMPRENTAS annualità 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”