Su 19 cabudanni 2022 sa Regione at presentadu s’annùntziu publitzitàriu “Sardigna, unu mundu istraordinàriu”, a su tzentru de sa istrategia noa de promotzione de s’Ìsula, a livellu natzionale e internatzionale.

Unu contadu innovativu, chi ponet a pare duos registros, cussu immaginàriu e cussu reale, pro medu de una narratzione noa, in lìnia cun sos standard atuales de comunicatzione, acanta su coladòrgiu de unu còdighe a s’àteru afòrtiat s’atratividade de su produtu vìdeu e s’efetu tzinematogràficu suo.

Sa Sardigna devenit de custa manera unu mundu foras dae s’ordinàriu capatzu de incantare e atràere a traessu de una pluralidade de cuntestos chi punnat a una difusione prus ampra e a su crompimentu de diferentes obietivos

S’annùntziu publitzitàriu est un’istòria iscenegiada, ue su fantàsticu s’ammèscurat cun su reale, in unu curre-curre de imàgines innovativas. S’arcu narrativu si realizat a fùrriu a sa figura de unu Mamuthone chi, in manera diversa dae sa rapresentatzione clàssica sua, si presentat comente  unu pessonàgiu bènnidu dae su mare chi nde istupat dae s’abba e arribat a s’Ìsula. Àteras microstòrias s’acàpiant a sa fabula tzentrale finas a s’isvelamentu, in sa maghia de un’ambiente noturnu, de s’identidade de su protagonista: suta de sa fatzola, difatis, b’est unu personàgiu feminile chi càmbiat s’idea prus nòdida de sa mascara patriarcale e creat in su matessi tempus unu corfu de iscena chi portat s’ispetadore dae sa dimensione onìrica a cussa bera cun su richiamu a s’identidade feminile de sa Sardigna.

In custu iscenàriu cunvivent diversas istòrias parallelas unidas dae sa figura innovativa de unu Gigante de Mont’e Prama chi agiudat su biàgiu de su Mamuthone finas a sa rivelatzione sua, cando, in su puntu finale de sa trama fantasy, s’àrtzia in su parmu de sa manu sua cun unu remonu craru a sa tzinematografia internatzionale.

Obietivu finale de su video contadu est difùndere una rapresentatzione de sa Sardigna atrativa totu sos meses de s’annu in totu su mundu.

“Progetto finanziato con l’Avviso Pubblico IMPRENTAS annualità 2021-2022”.

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22