Pro su de sete annos sa BJJ Summer Week — organizada dae s’associatzione S’Animu cun su contributu de primore de s’assessoradu regionale de su Turismu e de su Comunu de Casteddu — at a batire a Casteddu chentinaias de isportivos, cun acumpangiadores e famìlias: sunt prus de 700 is iscritos a is garas chi dae su 18 a su 25 de cabudanni s’ant a fàghere in su Palaboxe, in su palatzetu de bia Rockefeller, in s’impiantu de Monte Mixi. Sa manifestatzione dd’ant presentada is organizadores, Emanuele Frongia e Daniele Pisu, cun s’assessore regionale de su Turismu, Gianni Chessa, e s’assessore a s’Isport de su Comunu de Casteddu, Andrea Floris.

Fintzas in custa editzione sa Summer Week at a èssere una grande ocasione, pro Casteddu e totu s’àrea metropolitana, pro si pònnere a beru in vetrina. Hotel, B&B e fintzas in is domos in s’àrea metropolitana ant a donare acatu a sa comitiva de su BJJ, “cun sa punna se semper de fàghere connòschere su territòriu, is bellesas de sa Sardigna e, ocannu, fintzas is sabores locales, cun una expò pro is atletas, cun produsidores de binu e produtos tìpicos”, ant nado is organizadores.

Nch’est chin est lòmpidu a primu borta e àteros benent de sete annos, acabbada sa Summer Week, passat is ferias a arròlliu in s’Ìsula. S’apuntamentu cun su BJJ est un’addòbiu perfetu intra isport e turismu. S’annu coladu, in su prenu de s’acorru pro su Covid19, sunt lòmpidas acanta de milla persones, intra atletas, familiares e organizadores, pro unu de afàrios in su territòriu de acanta de 800 milla èuros. Ocannu sa punna est cussa de ci passare su millione de èuros. Intra is novas de ocannu, nch’est s’apuntamentu cun sa XXI editzione de Polaris, torneu de Jiu jitsu e grappling intra is prus de importu in su mundu, in programma su 24 de cabudanni benidore in Casteddu, in sa Summer Week. Ocannu sa seletzione at a èssere fintzas pro atletas sardos chi ant a pagare parte a sa manifestatzione internatzionale chi at a tènnere sa partetzipatzione de campiones meda, iscedados intra is mègius professionistas de su setore.

“Su Polaris — ant ispricadu Frongia e Pisu — est nàschidu in 2015 in Inghilterra e ammustrat de semper unu must de su jiu jitsu professionista e de is torneos invitational internatzionales. Custa cumpetitzione tenet unu regulamentu ispetzìficu chi avalorat sa sutamissione a comente punna prus arta de sa luta cunforma a is puntos e a is bantàgios clàssicos. Custu tipu de regula glòriat sa luta dinàmica e non permitit is situatziones de firmada o de passividade, regalende un’ispetàculu chena pretzedentes a chin assistet”. S’addòbiu de Polaris at a èssere fatu in s’Auditòrium de su Conservatòriu “Pierluigi da Palestrina” de Casteddu.

Sa manifestatzione de artes martziales ocannu at a èssere prus rica pro more de s’acòrdiu cun sa prataforma UFCpass, su canale tv ispetzializadu in artes martziales mistas urtimadas fight championship, chi at a portare s’immàgine de sa Sardigna in su mundu, a comente a fàghere sa manifestatzione chi, dae sa fundatzione, no est mai essidu de s’Inghilterra e de su Galles (chi ant tentu semper totu is editziones).

“Progetto finanziato con l’Avviso Pubblico IMPRENTAS annualità 2021-2022”

Oro e tempus benidore luminosu:Diego Nappi campione europeu Under 20 in sos 200 metros.

S’Italia de s’atletica tzoccamanos s’impresa de Diego Nappi,curridore de Portu Turres, chi at conchistadu sa medalla de oro in sos 200 metros in sos Europeos de Tampere, in Finlandia.

Supra sa pista scandinava, su talentu sardu chi curret po sas Flammas de Oro, sa truma isportiva de sa politzia, at firmadu su cronometru supra su tempus de 20”77, binchinde cun porosidade supra sos chertantes e cunfirmande de essere  unu de sos zovanos pius promittentes de s’isprint italianu. Sa sua est bistada una porfia perfetta,conduida cun grista e lughidore dae su primu a s’urtimu metru, isfruttande a su menzus una partentzia bissina e manteninde un’avantzamentu custante fintzas a s’arrivu.

Su resurtadu arribat a sa fine de una cumpetissione giai de livellu artu meda po Nappi, chi in sa semifinale de chenapura aiat marcadu su menzus tempus cun 20”76, unu tempus chi lu aiat postu in mesu de sos favoressidos po sa binchida e chi, bidinde sa finale at cunfirmadu sa superioridade sua tennica e mentale. Sa medalla de oro de Tampere est su fruttu de annos de allenamentu, sacrifitzios e determina, calidades chi ant permittidu a su zovanu curridore de Portu Turres de si faghere caminu in sa bista natzionale e internatzionale.

Ma s’abbentura sua in Finlandia no est ancora finida: dominiga Nappi at essere un’attera borta impignadu in s’istaffetta 4×100, inube at a chircare de battire un’atteru risurtadu  po s’Italia. Un’addobiu chi si carrigat de atteru signifficu, pro itte cras su curridore at a istudare 18 candelas, festande no solu s’edade manna, fa fintzas unu titulu europeu chi marcat una tappa de fundamentu de sa carriera zovana sua. Po issu, una festa po sos annos de ammentare po sempre, intre emossiones, medallas e su seru de tennere in daenanti unu tempus benidore tottu de iscriere in sas pistas pius de grandesa de su mundu. Sa Sardigna tenet unu novu arroddu isportivu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22