«Dì marranu», «marranu ca ddu fais», sunt faeddos chi a s’ispissu si intendent galu pro brulla cando s’allegat in sardu o fintzas alleghende in italianu. Si tratat de una ditzu de isfida, de desali, chi immoe si narat prus che totu pro brulla cando si bolet isfidare calicunu a fàghere calicuna cosa difìtzile. Ma in su tempus coladu custos faeddos non si naraint gasi a sa ligera, pro ite, comente amus nardadu, fiant paràulas de disafiu, o de meletzu chi si naraiant cando si brigaiat cun calincunu.

Ma ite bolet nàrrere pretzisamente marranu? Est unu tèrmine de origine medievale, chi benit dae s’Ispagna. Bolet nàrrere porcu. Custa ofesa beniat impreada a inghìriu de su sèculu XIV pro mutire sos ebreos cunvertidos a su cristianèsimu, ma chi sighiant a professare, a fura, sos ritos e sas funtziones de su giudaismu. Nàschidu pròpiu in unu cuntestu ìbericu, est dàbile chi su faeddu in beridade bèngiat dae su faeddu àrabu mahram (cosa proibida).

Durante su domìniu  ispànicu in Sardigna s’ìsula nostra fiat prena de ebreos sefarditas, comente testimoniadu dae sa presèntzia de su getu de sos Ebreos in Casteddu. Pro custu motivu est possìbile chi èsseret impreadu fintzas dae sos sardos contra sos ebreos cunvertidos chi sighiant a poderare sa religione issoro a iscusi.

Su faeddu duncas fiat un’ofesa manna chi si narait a una categoria particulare de persones. Posca cun su tempus est istadu impreadu comente faeddu de desafiu generale, sena distintzione de ratza o religione. In Sardigna sa paràula beniat acumpangiada dae unu gestu, cussu de nche betare su berreto a terra. Si sa persone lu brincaiat boliat nàrrere chi atzetaiat s’isfida, unu pagu comente si faghiat cun su guantu.

Oe totus narant marrano in modu brullanu, ma est giustu chi si connoscat s’origine sua.

“Progetto finanziato con l’Avviso Pubblico IMPRENTAS annualità 2021-2022”

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22