Pesada intre su 1284 e su 1288, durante sa segnoria de Ugolino de sa Gherardesca Conte de Donoratico, in su 1503 at leadu su ruolu de catedrale, e galu oe s’ùnica in Sardigna dedicada a sa Santa de Assisi. Su chi abarrat de s’edifìtziu originàriu rapresentat una testimonia de sa transitzione dae su romànicu a su gòticu in crae isulana. Sa fatzada est acostagiada dae unu campanile a canna cuadrada chi in sa tzella campanària  portat bator brunzos de is sos cales, su prus antigu – òpera de Andrea Pisano — est de su 1327.

S’internu, chi a subidu medas modìficas  dae su sèculu XVI, portat una pranta a rughe latina cun navada ùnica e capellas laterales. Sos arcos a sestu agudu partzint s’àula in bator campadas cobertas dae bias bòvidas a istella.

Custas fiant bènnidas postas in òpera in sos annos intre su 1576 e su 1588 e sunt importantes meda pro sas rafiguratziones issoro chi rimandant a sa sensibilidade artìstica e religiosa chi at caraterizadu sa sotziedade tzitadina in època ispagnola. Sa gemma tzentrale de sa prima bòvida giughet su crutzifissu isculpidu, sa de sa segunda campada un’iscena de su martìriu de Santu Antiogu (Patronu de sa Diòtzesi). Sa de tres bòvidas tenet a su tzentru sa figura a totu tundu de Santu Antiogu in pregadoria. Sa bòvida presbiteriale presentat a su tzentru su Cristu in sas bestes de Giùighe a sa fine de sos tempos, mentras in sas gemmas o craes minores sunt rafigurados de pare a pare Santa Crara, Santu Sebastianu, ancora Sant’Antiogu e Santu Giuanne Evangelista.

In sos muros de sa navada dae su sèculu XV fiant istadas abertas duas capellas pro ogna ladus. Sa prima a dereta dedicada a santu Nigola acollit s’istàtua de su pìscamu de Mira de fatura de su Seschentos. Subra de s’àtera banda sa prima capella, giai dedicada a su Santìssimu Sacramentu, acasàgiat un’altare chi in su nitzu suo allògiat s’istàtua de Vèrgine de su Rosàriu.

Sa navada atuale de manca imbetzes est su resurtadu de s’ingrandimentu de una pitica capella de su Chimbighentos dedicada a Sant’Antiogu; capella chi, dae su 1656, fiat istada ismanniada e imbellida, ma chi fiat istada urtimada petzi in su 1680 e est a nàrrere cando s’architetu lìgure Domenico Spotorno aiat fraigadu su corpus cupoladu. In su 1683, su Capìtulu de sa Catedrale, aiat cummissionadu, pro custa capella, a s’iscultore de orìgine sitziliana Onofrio Damatto su fàbricu de s’altare in istucu e màrmaru. Custu manufatu fiat istadu remplasadu dae s’altare mannu realizadu in linna de tzinnèberu isculpidu chi, comintzadu in su 1712, fiat istadu urtimadu in su 1718 e chi galu oe dòminat cun sa mannesa sua.

 “Progetto finanziato con l’Avviso Pubblico IMPRENTAS annualità 2021-2022”

Notte de maghia a s’unipol Domus: su Casteddu dominat su Verona.

Una serana de incornissare po su Casteddu e sos tiffosos suos. Sapadu sero s’Unipol Domus si est revertida in d’unu teatru de emossiones, inube sos ruju e blau ant dadu vida a una prestassione de macchine contras su Verona, fatta de intensidade, calidade e personalidade manna. Una partida chi at addurare istampada in sa memoria de su pubbricu casteddaju pro su giogu espressadu e su tremesu mustradu dae s’isquadra.

Fintzas dae sos primos mamentos su Casteddu at leadu in manos su pallinu de su giogu, pressande in artu e apprettande sos veronesos a si difendere. S’isquadra at mustradu ideas craras, movimentos lestros e una cumpattesa manna intre sas partes, dande s’impressione de potere corpare in cale si siat mamentu. Su goal de su vantaggiu, arrivadu in su primu tempus, at premiadu una manovra lurinosa e bene fraigada, faghinde iscoppiare s’istadiu.

Prima de sa fine de su primu tempus est arrivadu fintzas su secundu goal, cun d’una giogada ispettaculare chi at azzessu in manera deffinitiva sa galabera de s’istadiu. Unu goal cona de sa serana, capatze de arregare tennica, corazu e calidade, chi at mandadu su Casteddu a si pasare cun d’unu vantaggiu meritadu e su controllu prenu de sa partida.

In su secundu tempus sos ruju e blau non ant minimadu su ritimu. Antzis, ant sighidu a ispinghere cun determina,approffittande fintzas de sas difficultades de su Verona, chi fuit adduradu in deghe omines. Su Casteddu at controlladu sa boccia cun maduridade,cambiande defensa e attaccu, chentza mai dare s’impressione de cherrere amministrare su risurtadu.

Commente passaiant sos minudos sunt arrivados atteros duos goals, fruttu de cuncentratzione e de frittesa, chi ant serradu in manera deffinitiva sos contos e revertidu sa partida in d’una festa bera pro su pubbricu de domo. Donzi retza est bistada accollida cun d’unu sderroccu, accumpanzadu dae su attinu de abbaidare una de sas prestassiones prus accabbadas de s’istagione.

Addia de su risurtadu, a corpare est bistadu s’ispiritu de s’isquadra: unu Casteddu unidu, cravosu, capatze de si azzuare e sacrifficare, ma fintzas de divertere e si divertere. Una bittoria chi dat cunfiantza, morale e cunfirmat sa creschida de sa truma, mandande a daenantis cun fortza sas ambitziones ruju e blau.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22