Sos culurgiònes sunt connotos apetotu pro sa bonesa issoro e pro sa genuinidade. Mancari como si fatzant in belle totu sa Sardigna, siat in modu artigianale, siat in modu industriale, s’origine issoro est totu ogiastrina. Dae su 2015 sos “Culurgiones de Ogiastra” sunt istados reconnotos comente produtu IGP.

Su protzessu de traballadura de sos Culurgiones de Ogiastra IGP previdet duas fases: sa preparatzione de su pìgiu e sa preparatzione de su reprenu. Su pìgiu est fatu de sìmbula de trigu duru e farra de trigu modde; ògiu de porcu, sale e abba. Su reprenu portat  patata (60%-80%), casu aghedu, casu betzu, casu de craba. A banda s’ògiu de ghermanu si podent agiùngere in s’impastu fintzas sos aromas comente menta, fràbica, àgiu, chibudda. Sa preparatzione de su pìgiu acontesset unende totu sos ingredientes in s’impastadora. Su pìgiu benit traballadu bene e a una bia prontu si segat a formas tzirculares ue benit postu su reprenu.

Sos Culurgiones de Ogiastra IGP ant conchistadu unu postu de protagonistas gràtzias a s’identificatzione cun s’àrea geogràfica de produtzione, s’Ogiastra. Naschent comente  unu pratu pòveru, tìpicu de sa cultura agropastorale, e pro custu su reprenu est istadu adeguadu a sa disponibilidade de sos produtos de su territòriu. Difatis totus teniant sa patata e su casu.

Sos Culurgiones de Ogiastra IGP faghent a los cunservare in atmosfera modificada o surgelados. Benint consumados cotos. Sunt bonos cundidos cun bagna de tomata e casu sardu DOP trisinadu opuru cun botarga e ògiu de ghermanu extravèrgine de Sardigna DOP.  De tastare fintzas fritos in s’ògiu o cotos in sa braàgia, segundu sas retzetas tìpicas.

S’ispiga istilizada, chi caraterizat su particulare modu de serrare sa pasta originària de sa regione geogràfica de s’Ogiastra, pro traditzione benit fata a manu. Su resurtadu ammentat unu puntu de ricamu ca sa pasta, pro serrare su reprenu de sos Culurgiones de Ogiastra IGP.

 “Progetto finanziato con l’Avviso Pubblico IMPRENTAS annualità 2021-2022”

Adiosu a sos timbros in sos passaportos: arribat su sistema digitale nou in sos aeroportos de s’Unione Europea

Dae domìniga càmbiat su modu de biagiare in sos cunfines de s’Unione Europea: adiosu a sos timbros in sos passaportos, pro lassare logu a sa registratzione eletrònica. In fatis est intradu in funtzione su sistema informàticu europeu de intrada/bessida chi at a leare su postu a bellu – a bellu de su controllu a manu de sos documentos pro sos tzitadinos extra-UE chi passant sos cunfines de s’àrea Schengen.

Su sistema, operativu a su comintzu in modalidade graduale, cunsentet de registrare digitalmente intradas e bessidas cun sa rilevatzione automàtica de sos datos biomètricos — imprentas digitales e immàgines de sa cara — de chie intrat o bessit dae s’Unione. Sa punna est de fàghere sos controllos prus in presse, redùere sas filas e afortigare sa seguresa in sas fronteras, assegurende una traciabilidade lestra de sos movimentos.

Ogni borta chi unu biagiadore at a passare unu cunfine esternu Schengen, su sistema at a registrare die, ora, puntu de intrada e durada autorizada de sa permanèntzia, faghende a manera chi non b’apat bisòngiu de su timbru in su passaportu. In custa manera at a èssere prus fàtzile a iscobèrrere si b’at istadu carchi permanèntzia ultres sos lìmites cunsentidos e megiorare sa gestione de sos flussos migratòrios.

S’ativatzione s’at a fàghere a bellu – a bellu in totu sos Paisos de s’àrea Schengen e at a interessare aeroportos, portos e passàgios in terra. S’operatividade cumpleta est previdida in intro de su 2026, cando su sistema at a èssere integradu cun s’autorizatzione eletrònica de biàgiu noa domandada a sos tzitadinos de àteros Paisos chi non tenent bisòngiu de visto. Sas autoridades europeas narant chi su passàgiu a su digitale rapresentat unu passu de importu a cara a una frontera comune prus moderna e chi funtzionat mègius, ma avertent puru sos biagiadores chi bi podet àere carchi rallentamentu a su comintzu in sa fase de rodàgiu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”