A s’atore americanu est istadu proibidu de partetzipare a cale si siat eventu organizadu dae s’Academy  pro s’imbeniente deghènniu.

Sighint a andare a in antis sas chistiones pro su gestu de Will Smith a dannu de Chris Rock durante sa note de sos Oscar.

S’Academy s’est riunida pro valutare eventuales santziones e at vietadu a s’atore americanu sa partetzipatzione a cale si siat eventu organizadu dae s’Acadèmia in sos 10 annos imbenientes: non si tratat petzi de sas imbenientes tzerimònias de sos Oscar, ma de cale si siat manifestatzione pessada dae s’Academy, siat in presèntzia, siat in forma virtuale.

Sa detzisione est arribbada a pustis de una riunione in ue sos membros de s’Academy e sos guvernadores ant esaminadu su casu de Will Smith, protagonista de una situatzione mai capitada prima in s’istòria de sos Oscar. S’atore at cummentadu a sa lestra in una decraratzione acanta narat chi atzetat sa detzisione.

S’Academy in prus at torradu gràtzias a Chris Rock pro àere poderadu sa calma in una situatzione gosi istraordinària.

Will Smith at donadu unu tzafu a Chris Rock a pustis de sa botada de su còmicu subra sa possibilidade chi sa mugere de Smith, Jada Pinkett, esseret pronta a girare sa sighida de  sa pellìcula «Soldato Jane». Pagos minutos a pustis de cuddu momentu terrorosu, s’atore est istadu premiadu comente  su mègius atore protagonista (binta cun su film «Una famiglia vincente– King Richard»), pronuntziende un’arresonu càrrigu de retòrica.

Will Smith aiat presentadu, belle una chida a oe, sas dimissiones suas dae s’Academy de sos Oscar, agiunghende chi diat àere atzetadu “cale si siat àtera cunsighèntzia”.“S’elencu de cussos chi apo ofèndidu est longu e includet Chris, sa famìlia sua, medas de sos amigos meos e persones caras, totu sos presentes e su pùblicu de domo”, at naradu Smith, agiunghende de àere “traitu sa fide de s’Academy. Nde apo leadu a sos àteros candidados e binchidores s’oportunidade de tzelebrare e de èssere tzelebrados in manera serena pro su traballu issoro. So tristu meda”. S’atore at concruidu narende chi “su cambiamentu recheret tempus e m’impinno a traballare pro non permìtere mai prus a sa violèntzia de bìnchere subra sa resone”.

 “Progetto finanziato con l’Avviso Pubblico IMPRENTAS annualità 2021-2022”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22