Su libru “Madre ombra” de Matteo Porru est istadu traduidu in su limbàgiu pro sos non bidentes. A l’annuntziare est sa domo editora La Zattera chi at donadu sa nou a unas cantas oras dae sa presentada de su libru a s’Istitutu de sos Tzurpos de sa Sardigna “Maurizio Falqui” de Casteddu.

Su romanzu “Madre ombra” de Matteo Porru at a èssere traduidu in sa limba Braille, su limbàgiu impreadu pro sos non bidentes e pro sos ipovedenti. Est istada sa domo editora La Zattera a dare custa bella noa pagu prima de sa presentada de su libru a s’Istitutu de sos Tzurpos de sa Sardigna “Maurizio Falqui” de Casteddu. “La Zattera balla pro s’ùrtima bia cun Matteo – cummentat s’editore Cocco -, a pustis de unu longu cursu paris”.

“Una noa bella meda –at cummentadu Matteo Porru -, chi concruit unu percursu comintzadu bator annos a oe cun s’obietivu de rèndere sos romanzos atzessìbiles pro totus, fintzas pro sos chi non bident. Cun ‘Madre ombra’, posca, chi est unu romanzu chi indagat sa tzurpia, su chircu s’est serradu in sa manera mègiu. Unu ringratziamentu ispetziale andat a Alessandro Cocco e a Margherita Orgiana, chi sunt istados sos chi m’ant donadu coddu pro totu custu tempus”.

“Madre ombra” contat s’istòria de Lara Diotallevi, una pitzoca tzurpa chi andat a s’iscoberta de su mundu. Su romanzu, essidu in su mese de làmpadas de tres annos a oe, at conchistadu in modu ispantosu sa crìtica e pùblicu, otenende medas e medas reconnoschimentos a livellu regionale e natzionale. Franco Manzoni, in su giornale Corriere della Sera, l’at definidu “una anàlisi aguda de  chie sufrit”.

“Madre umbra” (Edizioni La Zattera, 2019) est sa de tres òperas de Matteo Porru, finalista a su prèmiu Campiello Giòvanos.

S’istòria, ambientada in sa Venètzia de sos annos ’50 e ’70, allegat de sos primos bintitrès annos de vida de Lara Diotalevi, dae sa pitzinnia caraterizada dae sa tzurpia e de milli timorias, a sa  edade majoreconchistada cun matana e impestu. Sa pitzinna, òrfana adotada dae unu cunventu de mòngias de sa Caridade, agatat cunfortu solu in sas figuras de sa mòngia Elsa e de  Riccardo, una genia de ànghelu guardadore.

 “Progetto finanziato con l’Avviso Pubblico IMPRENTAS annualità 2021-2022”

Stefano Oppo, braga de su canottaggiu sardu, at segudadu unu nou sonniu de sa carriera sua paris cun su cumpanzu Gabriel Soares,triunfande in sa porfia de cropa de sos carricos lepios, in s’urtima fase de sa Coppa de Su Mundu de Canottaggiu in Varese.

Sa binchida insoro est bistada unu triunfu, non solu personale, ma puru po s’isport de sa Sardigna, chi si est distintu supra de s’iscena internatzionale. Su primu postu in sa porfia de cropa carricos lepios est bistadu su puntu de arribbu de unu isforzu istravanadu de sos duos isportivos, chi si est bidu meda in su finale de sa porfia, chi che at bogadu s’alenu.

Chentza duda, unu momentu chi non si at podere ismentigare po issos, e unu motivu de arroddu mannu po sa comunidade isportiva sarda.

Stefano Oppo, naschidu in Aristanis, est arribadu a sa chima de sa carriera sua, binchinde s’oro in sa Coppa de su Mundu, paris cun Gabriel Soares, in sa cropa carricos lepios. Sa proa insoro est bistada desamplada,addobbande sos ribales isvizzeros Jan Schaeuble e Raphael Ahumada, in sos urtimos momentos de sa porfia.

Una cumpetissione ammaghiante chi si est congruida cun sa conchista prena de gloria de sa medaglia de oro, mustrande unu arrebattu prenu de emotzione po sas Olimpiades de Parigi de su mese de lampadas de cust’annu.

Una binchida emossionante, accantzada cun d’unu recuberu istravanadu in sos urtimos metros contra s’Isvizzera, chi at dominadu sa porfia po casi tottu sa dura. Semus meda cuntentos, pro itte custa medaglia de oro est po nois unu riscattu beru, at cummentadu Oppo pustis de sa fine de sa porfia.

Commo, po s’atleta sardu, bi ant essere duas chidas de riposu e allenamentos cadrios, aspettande sos Campionados Europeos, chi si ant a faghere in Szeged in Ungheria, dae su 25 a su 28 de Aprile. At essere un’attera occasione po affortigare sa binchida insoro e sighire a essere su menzus de sa Sardigna e de s’Italia in su cataffale internatzionale de su canottaggiu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22