A pustis de s’essida in sos tzìnemas sardos, Il Muto di Gallura, de Matteo Fresi cras, su 1 de abrile, arribbat a Milano, cun sa projetzione in su Tzìnema Anteo – Piazza 25 Aprile 8, in  presèntzia de su regista e de sos atores totus.

Ispiradu a unos cantos acuntessimentos de crònaca capitados de a beru in s’Otighentos in Gallura e a su romanzu istòricu de su tataresu Enrico Costa essidu a pagos annos de distàntzia de sos fatos,  in su 1884, su film Il Muto di Gallura allegat de sa disamistade tra sas famìlias Vasa e Mamia, chi aiat causadu sa morte de  de 70 persones e prus.

Su personàgiu printzipale, Bastiano Tansu est bìvidu a beru. Fiat surdumudu dae cando fiat nàschidu e pro custu fiat istadu tratadu male dae cando fiat minore. A sa fine, a fortza de soprusos e maletratos, pèedet sa passièntzia e detzidet de si vengare, dende cumentzu in custa manera a sa fàida famada tra sos duos areos. Sa morte de frade Michele e su ligàmene cun su caporione de sa famìlia Vasa, sunt sos motivos chi armant sa manu assassina sua. Mancari totu sos tentativos de fàghere sensare sa disamistade dae banda de s’istadu e de sa crèsia, sos omitzìdios sighint sena pasu.

A s’agabbu però, cando Bastiano paret àere agatadu fintzas sa paghe interiore in s’amore currispostu pro sa fìgia de unu pastore, sa fàida agabbat e sas duas famìlias in disamistade lòmpent a sa paghe, detzisa in sa bidda de Azos. Però pro totu su sàmbene ispainadu, mancari s’esseret pesadu in mundu violentu e sena respetu, acanta totus lu cunsideraiant fìgiu de su dimòniu, Bastiano non podet èssere assòlvidu e pro custu  a andare a s’atopu cun sa morte pro manu de su matessi fradile Pietro Vasa.

Cras, su 1° abrile, a ora de sas 20, in su Tzìnema Anteo — Piazza 25 Aprile n. 8, sa pellìcula at a èssere projetada in presèntzia de su regista e de sos atores.

 “Progetto finanziato con l’Avviso Pubblico IMPRENTAS annualità 2021-2022”

Provìntzias sardas ancora invisìbiles pro s’Istadu: entes operativos ma sena èssere reconnotos a manera ufitziale

Sas Provìntzias noas de Sardigna – Sulcis-Igresienti, Gaddura, Campidanu de Mesu e Ogiastra – sunt oramai una realidade amministrativa cuncreta, cun organismos votados, personale in servìtziu e operatividade cumpleta in su territòriu. Nointames, pro s’Istadu tzentrale, custas istitutziones sighint a no esistire a manera crara. Una cunditzione chi est causende discumbènios, istentos e dannos econòmicos mannos.

Sa chistione l’at pesada su PD cun un’interrogatzione parlamentare chi ponet in evidèntzia s’irregularidade: sa Regione Sardigna at finidu dae ora totu sas protzeduras chi serbint a reconnòschere sas Provìntzias noas, mandende a sos ministèrios cumpetentes sos documentos ufitziales. Nointames, su Guvernu no at ancora assignadu sos còdighes identificativos chi serbint, ne at agiornadu sos database natzionales.

Faltende custos reconnoschimentos formales, b’at efetos graes. Sas Provìntzias noas non podent aprovare sos bilàntzios triennales, non tenent intrada a sos trasferimentos istatales e non podent esigire sos tributos chi lis ispetant. Custu blocu amministrativu, a su chi si vàlutat, càusat una pèrdida de 12 milliones de èuros (prus o mancu) a s’annu, in prus de rallentare sa distributzione de servìtzios essentziales pro sa gente e pro sas impresas.

Su de no èssere iscritas in sos registros ufitziales de s’Istadu, in prus, non permitit de impreare su dinari de su PNRR e de su Fundu de Isvilupu e Coesione. Sos progetos giai prontos arriscant duncas de abarrare firmos ca bi mancat ebbia su còdighe de s’ente, chi est una cosa chi resurtat sena resone pro territòrios chi ant giai comintzadu sas atividades amministrativas issoro.

Pro su PD, custu est su sìmbulu de sa paràlisi de su Guvernu a cara a s’autonomia sarda. Sas Provìntzias sunt operativas, reconnotas dae sa Regione e dae sa gente, ma sighint a èssere invisìbiles pro s’Istadu, comente chi non s’agatent.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”