Sas nassas noas ecocumpatìbiles sunt una realidade a sa Cooperativa Piscadores de Tortolì.

Sunt pondendesi in òpera, suta de sa supervisione de s’agèntzia regionale Agris, sas nassas ispetziales in gradu de risòlvere su fenòmenu disastrosu de sa pisca pantasma.

Cada annu difatis benint ispèrdidas in mare deghinas de mìgias de atretzaduras pro sa pisca costera e sas càusas sunt medas: maregiadas, dispetos, ma fintzas imprevistos comente  su coladòrgiu de barcas de pisca chi a malasciagura  agantzat sas retzas.

Su disacatu càusas dannos ambientales e incuinamentu, comente ant evidentziadu sas chircas acumpridas dae entes ufitziales in totu su mundu, e cunfirmadu fintzas dae Agris. Sos trastos de pisca abbandonados in sos fundales marinos divenint teges mortales chi, a pustis una terrorosa agonia, ochient unu muntone de pisches chi bi restant arrèschidos. Simone Serra, chircadore de Agris, cun sos collegas suos collàborat dae 12 annos cun sa Cooperativa Piscadores Tortolì agatende solutziones chi fatzant prus ètica sa pisca e amparent s’ecosistema de sas costas sardas.

“Amus chertu afrontare unu problema ispetzìficu, cussu de sas nassas abbandonadas – ispiegat Serra — De sòlitu si pensat chi cussas sena s’esca non siant in gradu de piscare nudda, e chi cando sunt ispèrdidas in mare non càusent perunu disacatu. A dolu mannu sa chirca nostra at cunfirmadu chi custas gasi naradas nassas disinnescadas sunt in gradu de atzapare diversos grammos de pische ogni die. Custos, multiplicados pro totu sas deghinas de mìgias de nassas chi cada annu benint abbandonadas in mare, faghent cumprèndere s’entidade de su disastru ambientale”.

Sa Coop de Tortolì at detzìdidu de contivigiare sos resurtados de sa chi podiat abarrare una de sas medas chircas teòricas isperimentales. Sas nassas ispetziales permitint s’inativatzione (abertura) una bia chi sunt ispèrdidas in mare. Gràtzias a sa collaboratzione de su sòtziu Paolo Cristo, e a sa supervisione de Agris, immoe benint impreadas in mare solu nassas chi permitint de fàghere una pisca a beru ecocumpatìbile, dotadas de unu sistema chi impreat su mecanismu de sa còpia galvànica pro rèndere innòcuas sas teges. Si tratat de afortigare su trastu de pisca cun un’aparatu chi permitat sa liberatzione de cussu atzapadu a pustis de 50-70 dies. Cras, sas chi oe sunt de sas teges mortales, ant a pòdere gasi devènnere una domo pro totu sos abitantes de su mare.

“Progetto finanziato con l’Avviso Pubblico IMPRENTAS annualità 2021-2022”

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22