Sa Sardigna est su logu in ue s’agatat sa resòrgia prus grae de su mundu. Su meressimentu est totu de Paolo Pusceddu de Àrbus, chi in sa bidda sua etotu at fundadu su “Museu de su gurteddu”, acanta sunt allogados e espostos sos gurteddos arburesos prus bellos. S’arburesa prus manna est s’atratzione de custu museu e est istada fata dae Pusceddu in sos annos ’90. Est longa 4,85 metros e pesat  295 chilos.

Custu trastu est intradu in su 1996 comente su prus mannu e grae de su mundu, ma de calicunu annu su primadu de su prus mannu (ma non de su prus grae) est istadu “furadu” de un’àteru gurteddu sardu, sa “Patadesa” de 5,65 metros fata dae s’artesanu gadduresu Gianmario Tedde.

Totus ischint chi su gurteddu sardu in prus de èssere un’aina de traballu est fintzas  un’ogetu identitàriu. Mescamente in sas zonas internas, totus teniant su gurteddu in butzaca, siat pro ite serbiat in sa vida de ogna die, siat comente ogetu de difesa, o peus ancora pro agredire.

Ses in sartu e tenes bisòngiu de segare unu bucone de linna o bestire unu ladus de petza? Ses sètzidu in sa mesa e deves segare su pane o su sartitzu? Duncas ti serbit sa resòrgia.  Unos cantos gurteddos sardos serbint pro creare decoraduras in sos panes tìpicos, ma b’at numerosos tipos de gurteddu chi si distinghent pro sa forma, casta de sa lama, su tipu de ossu impreadu pro sa màniga. Si mutint patadesa, guspinesa, arburesa, e non petzi. Prus chi un’ogetu artesanale, un’ogetu de apartenèntzia, faghende parte de s’iscàtula de sos atretzos de base de su sardu de sartu. E cadaunu tenet su suo!

 “Sa lepa” est  su nùmene prus comunu de custos ogetos, ma si narat peri resòrgia. A bandu su nùmene sa cosa chi contat de prus est chi est ispainadu in totu sa Sardigna, ma sas biddas cun traditzione prus manna in sa produtzione sunt sena duda Patada, Santu Lussùrgiu e Àrbus.

 “Progetto finanziato con l’Avviso Pubblico IMPRENTAS annualità 2021-2022”

Abbiza massima po arrischiu de fogos in sa Sardigna orientale:irrattadu su bullinu ruggiu.

Sa Protetzione Tzivile regionale at bogadu a fora unu novu e affuscaante bullettinu po s’arrischiu de fogos artziande su livellu de abbiza a su codice ruggiu, chi indittat periculosidade manna. Sos logos pius interessados sunt Casteddu e tottu su sud-est de s’isula, giai corpadas sas dies passadas, in manera particulare dae su fogu mannu chi  at devastadu sa zura de Villasimius su 28 de triulas. Ma s’allarme non si firmat a su sud: casi tottu sa parte orientale de sa Sardigna est cunsiderada a arrischiu massimu, escluidinde unu trettu limitadu de sa costa nugoresa.

Su bullinu ruggiu cumprendet puru s’Arta Gaddura, e fintzas localidades turisticas comente Costa Paradiso e Isola Rossa, logos chi sunta meda punnados in s’istiu. A rendere su quadru meda pius criticu est su bentu mannu chi podet arribare a sos 40 km/h, e chi podet aumentare sa die de dominiga. Bentu siccu e temperaduras artas creant unu mix periculosu, chi favoressint s’allughidura e sa lestra diffusione de sos fogos.

Sa situatzione meteo chi si ispettat est capatze de allughere fogos cun d’una intensidade de su fogu e una lestresa de diffusione medas artas chi, si mancat s’interventu lestru, podent in lestresa fuere a su controllu, fintzas cun s’impittu de sos aereos de sa regione e de s’istadu. In su mentres su Corpu Forestale regionale est giai impignadu in su campu: sunt faghinde un’interventu in sa zura de Belvì, in provintza de Nugoro, inube su fogu at corpadu sa localidade de Pitzu ‘e Pranu. Sas operassiones de istudamentu bient a s’opera puru un’elicottero, cosa chi testimonzat sa difficultade de sas cunditziones de oe. S’incumandat sa massima prudentzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22