A pustis de bint’annos in Loceri torrat a nàschere sa Pro Loco, gràtzias a sa collaboratziones de  tzitadinos e de s’amministratzione comunale. Punna printzipale de s’assòtziu at a èssere sa promotzione de sa bidda, s’aparitzu de eventos e de manifestatzione chi fatzant crèschere su burgu comente  meta turìstica, non pro s’istade ebbia, ma a totu annu.

A Pro Loco noa de Loceri at a èssere su puntu de riferimentu pro sa promotzione de su territòriu e at a èssere de istìmulu pro fàghere torrare a nàschere s’assotziatzionismu in sa bidda a pees de Monte Tarè, chi in sos ùrtimos annos  est devènnidu de sa pàtria de murales, de  museos istòricos e de sa massaria, comente su museu famadu “Sa Domu de s’Ollu, gestidu dae 7 annos dae Alessandro Podda. Sa nàschida de s’assòtziu est istadu formalizadu eris a mangianu, in sa sede lanuseina de s’Agentzia de is Intrada. 32 sos sòtzios fundadores, chi pro s’ora ant a atopare in manera temporànea in sa palestra comunale de Bia Eleonora de Arborea.

Importante sa  collaboratzione cun s’amministratzione comunale.

<Tocat a si donare de fàghere– at naradu bregiosu e cuntentu su sìndigu Gianfranco Lecca — e recuperare su tempus pèrdidu, sende chi in bidda sa Pro Loco mancaiat dae bint’annos.>

<Pro Loco est in pensus nàschida– at naradu Enrico Pistis assessore a su Turismu de su Comunu — ma tenimus giai sas ideas craras de su chi tocat a fàghere.  Nois comente amministrazione amus a collaborare e amus a èssere a presu de s’assòtziu pro s’ammaniu de eventos e manifestatziones chi promovant su territòriu. >

Pro s’amministratzione comunale at a èssere de grandu importu s’esperièntziade sos ùrtimos annos, acanta Loceri est divènnida una realidade turìstica afirmada in su panorama regionale. Su traballu de iscuadra e sa gana de fàghere de sos tzitadinos, difatis, non sunt mai mancados mancari su momentu delicadu.

 “Progetto finanziato con l’Avviso Pubblico IMPRENTAS annualità 2021-2022”

Piantagione manna de marijuana in sa zona de Aristanis: noe arrestos e fua impedida dae sos carabineris

Una piantagione manna de cànnabis cun prus de 7 mìgia prantas est istada iscoberta in sas campagnas de Terraba, a canta a Aristanis, cun su bilàntziu de noe arrestos, e intre custos unu minorenne. S’operatzione, fata dae sos carabineris de su Repartu Operativu – Nùcleu Investigativu de Aristanis paris cun su Corpus forestale e de vigilàntzia ambientale de sa Sardigna, est unu de sos secuestros prus de importu de sa zona in sos ùrtimos meses.

S’iscoberta de custa cosa est su frutu de un’atividade atenta de controllu de su territòriu dae sa forestale de s’istatzione de Marrùbiu, chi ant agatadu sa coltivatzione suspeta, sighida dae osservatziones remotas fatas cun drones paris cun sos carabineris. Sos atzertamentos in contu de THC, fatos dae su RIS de Casteddu, ant cunfirmadu chi sas prantas cunteniant livellos de printzìpiu ativu prus artos meda de sos lìmites de lege.  Est sa de chimbe piantagiones secuestrada in zona de Aristanis in sos ùrtimos duos meses.

Su blitz est iscatadu cando sos militares ant agatadu unas cantas persones chi tentaiant de nde tirare sas prantas in su terrinu tra Terraba e Arcidanu. Mancari s’alt de sos carabineris, sos suspetados ant chircadu de si nche fuire. Unu de sos mezos est istadu blocadu luego in ie, mentres a sos àteros duos lis ant postu fatu peri sas istradas de sa zona.

Su primu l’at firmadu sa patùglia Radiomobile, s’àteru l’ant intertzetadu in Àllai, in ue sas patùglias de sos carabineris de Mògoro ant blocadu ses chi si nche fiant fuende, luego los ant percuisidos e leados a caserma. Cando ant controlladu sos mezos ant agatadu ràdios rice-trasmitentes, passa-montagna, atretzos pro ispacare e segare e dinari in contante, totu cosas chi faghent a cumprèndere chi esseret unu
progetu organizadu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”