Mancari sa pandemia, sa Politzia Istradale in Sardigna at sighidu in s’òpera sua de preventzione, pro more de limitare su nùmeru de intzidentes e de mortes.

Peri in Sardigna, comente in Itàlia, sa Politzia Istradale at fatu unu resocontu de s’atividade sua, chi in su 2021, mancari s’apretu sanitàriu, est istada forte e contina.

Dae su 1° de ghennàrgiu a su 31 de mese de idas 2021 sunt istados fatos 35.000 controllos de persones e cuntestadas 27.322 infratziones a su Còdighe de s’Istrada.

Is violatziones atzertadas sunt istadas prus che totu cussas pro etzessu de velotzidade, est a nàrrere 4.997, ma medas sunt istadas peri is patentes (2.115) e is cartas de tzirculatzione (1.250) retiradas. Casi 60 mìgia imbetzes sunt is puntos patente leados.

Is automobilistas sutapostos a s’etilòmetru sunt istados 14.338, de custos 661 santzionados pro ite si sunt postos a sa ghia a pustis de àere bufadu alcòlicos, mentras cussos denuntziados pro ghia suta de s’efetu de drogas sunt istados 17.

A dolu mannu dae su raportu annuale de sa Politzia Istradale nde essit a campu chi is intzidentes sunt istados prus de s’annu 2020, acanta  si fiant registrados 17 intzidentes mortales cun 19 vìtimas e 319 intzidentes cun lesiones cun 448 persones feridas. In 2021 sunt istados rilevados 15 intzidentes mortales cun 16 vìtimas, e 367 intzidentes cun feridos cun 489 persones feridas.

Is datos chi pertocant su trasportu professionale sunt malos etotu. In is istradas sardas sunt istados impreados 168 politziotos, chi ant controlladu 1044 autocarros, 20 de custos de natzionalidade istràngia, atzertende 325 infratziones e retirende 2 patentes e 5 cartas de tzirculatzione.

S’atividade investigativa est istada dedicada prus che totu a parare fronte a is fenòmenos criminales comente su tràficu illètzitu de is veìculos, chi at portadu a su deferimentu de 6 persones a s’A.G. cun su secuestru 7 veìculos ogetu de ritziclàgiu. 61 sunt istados imbetzes is controllos a is esertzìtzios pùblicos, chi ant cumportadu sa rilevamentu de 12 violatziones.

 “Progetto finanziato con l’Avviso Pubblico IMPRENTAS annualità 2021-2022”

Sardigna cun Matteo: unu biàgiu ispantosu intre itineràrios e comunidade

Matteo Gamerro, ingegneri de 46 annos originàriu de Barone Canavese, in provìntzia de Torino, est prontu pro un’aventura noa in Sardigna, chi at a comintzare s’8 de santugaine dae Terraba e at a sighire finas a su 14 de santugaine.

“Sardigna cun Matteo” est su nùmene de su progetu chi l’at a bìere andende peri s’itineràriu de Nostra Segnora de Bonària e in s’itineràriu mineràriu de Santa Bàrbara, passende in Arbus, Gùspini e Montevecchio, in sa provìntzia de Sud de Sardigna. Matteo, chi si faghet a cumprèndere pro mesu de puntadore oculare, at a èssere acumpangiadu in totu su biàgiu dae unu grupu de “Ànghelos de sa Guàrdia” chi l’ant a portare cun sa carrotzina ispetziale sua.

S’idea est istada de Federica Laneri, apassionada de Costa Verde e de Sardigna. Gamerro, persone curiosa dae semper, isportiva e amantiosa de sos biàgios, at agatadu in su caminare una manera pro sighire a esplorare su mundu nointames de sa diàgnosi de sclerosi multipla, chi at tentu a 20 annos. Dae 16 annos in carrotzina, Matteo at imparadu a si torrare a imbentare sa vida, mustrende chi finas a sas provas prus dificultosas si lis podet parare fronte sena rinuntziare a sos sognos.

S’esperièntzia sua in sos biàgios est una chirca de connoschèntzia e de isperimentatzione contìnua. Laureadu in ingegneria, bivet in mesu de sa natura in Barone Canavese e impreat su puntadore oculare pro si fàghere a cumprèndere e pro iscrìere, siat in computer siat in sos social. Dae su 2015 at publicadu chimbe libros, comente “2 grandi + 2 piccole” e “4 uguali”. At giai fatu duas bortas su biàgiu de Santiago e 1.300 chilòmetros de s’itineràriu de Santu Micheli. Sas impresas suas sunt documentadas in duos docufilm, de projetare in Sardigna, in Terraba, Gùspini e Arbus.

Onni pasu in su biàgiu de Matteo at a èssere oportunidade de iscàmbiu culturale e sotziale: atòbios cun amministradores locales, istudiantes, tzitadinos e assòtzios, e in prus momentos de convivialidade e esperièntzias in su territòriu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”