Cun terapias intensivas e ricòveros in is repartos ordinàrios oramai in prus de su lìmite possìbile e un’istima de 2,5 milliones de persones in cuarantena, sa de bator undadas de su Covid, a càusa de s’ispàinu lestru de sa variante Omicron, arriscat de “firmare” s’Itàlia, cun puntas chi diant pòdere tocare is 10 milliones de persones in isulamentu, comente ipotizant vàrios infetivòlogos.

Pro custu is guvernadores proponent s’idea de una cuarantena curtza pro chie at retzidu sa de tres doses de su vatzinu.

Una proposta chi diat dèpere èsssere giai in sa mesa de su guvernu e chi in is dies imbenientes at a èssere valutada dae su Comitadu Tècnicu Sientìficu, comente at cunfirmadu su matessi cummissàriu pro s’apretu, Francesco Figliuolo, in bìsita oe in su puntu vatzinale pediàtricu de Torinu.

Su Generale at afirmadu chi sa riflessione subra su nùmeru de persones in cuarantena, est istada fata custu mangianu cun su ministru Speranza e is iscientziados de s’Istitutu Superiore de Sanidade.

Segundu is primas informatziones si diat pòdere arribbare a una reduida de su perìodu de isulamentu, pro is cuntatos istrintos ebbia, finas a 3-5 dies. Pro s’ora, difatis, sa cuarantena pro is cuntatos de unu positivu est de 7 dies pro is vatzinados e de 10 pro chie non tenet sa cobertura vatzinale.

Tra is printzipales sustenidores de sa cuarantena curtza ddoe est su guvernadore de sa Ligùria, Giovanni Toti, chi non pro àteru aùgurat fintzas s’isparghidura de s’òbrigu vatzinale. Est a nàrrere su chi diat pòdere èssere su passu imbeniente a pustis de sa reduida de sa cuarantena.

Fintzas àteros guvernadores sunt ispinghende pro cambiare is règulas prima chi si blochet totu su Paisu, rilantzende sas decraratziones de is vàrios infetivòlogos

Comente at naradu su famadu infetivòlogo Bassetti si diat andare cara a prus a mancu 100.000 contàgios a sa die e custu at a sutzèdere tra pagu tempus – faeddos suos– e tando 7-10 dies de cuarantena, diant bòlere nàrrere unu millione de persones chi ant a finire in isulamentu. Cunsiderende posca chi in mèdia ognunu de custos at tentu 5, calicuna bia 10 cuntatos, s’arriscu est de tènnere in su giru de 7-10 dies 10 milliones de persones in isulamentu. Non nos si ddu podimus permìtere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Energia, creschet s’ispesa pro impresas e famìllias sardas

Sas impresas e sas famìllias sardas sunt sighende a fàghere sos contos cun una depressione energètica chi, nointames de sos primos signales de rallentamentu, paret ancora resistente meda.

Su pesu de sas bulletas abarrat artu meda e nch’est ancora a tesu sa normalidade de sos prètzios de in anti de sa crisi. S’energia abarrat unu de sos fatores chi pesant de prus subra de sa solididade econòmica de sa Sardigna, cunditzionende non sa cumpetitividade de sas aziendas ebbia, ma finas sa calidade de sa vida de sa gente.

Sas impresas piticas e medianas de s’ìsula ant tentu un’ispesa in prus de 77 milliones de èuros (prus o mancu) causada dae s’energia incarida. Unu nùmeru importante chi ponet frenos a sas intradas, ponet barrancos a sos investimentos e bortas meda non permitit sa pianificatzione de sa crèschida. Finas pro sas famìllias sardas sa situatzione abarrat dificultosa. Sos prètzios pro s’impreu de s’elètricu e de su gas in paragone a su 2021sunt prus artos de su 42,3%.

Su cunfrontu cun situatziones europeas prus o mancu che pare ponet in evidèntzia comente a sas impresas sardas piticas e medianas lis tocat de parare fronte a una diferèntzia cumpetitiva carculada in 14 milliones de èuros. S’energia duncas est est una de sas isfidas prus importantes pro s’isvilupu econòmicu de s’ìsula. A minimare su càrrigu fiscale in sas bulletas, faghende finas interventos mirados pro fàghere crèschere sa resa energètica e s’auto-produtzione, podet dare un’agiudu pro chi su benidore de sas impresas e de sas famìllias sardas si potzat suportare mègius.

Su de passare a fontes rinnovàbiles e su de megiorare sos consumos sunt trastes primàrios pro minimare sa dipendèntzia dae sos mercados de fora e pro trasformare s’ispesa pro s’energia in una possibilidade de crèschida, cumpetitividade e annoamentu. In una situatzione econòmica globale pagu segura, a moderare s’ispesa energètica est indispensàbile pro dare istabilidade a sas aziendas, pro agiuare sa gente e pro s’isvilupu sostenìbile de sa Sardigna intrea.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”