Bene meda su Casteddu in Copa Itàlia chi est rèsessida a bìnchere pro 3-1 contra su Cittadella, iscuadra chi est giogandu in su campionadu de Sèrie B.

Tres puntos chi pro is òmines de Mazzarri mancant in su campionadu de Sèrie A de medas giorronadas a beru, duncas mancare sunt lòmpidos in un’àtera competitzione de fùbalu, sunt importantes pro s’ànimu de s’iscuadra. A is otavos de finale de sa Copa, is sardos ant a agatare su Sassuolo, iscuadra emiliana allenada bene meda dae Dionisi.

Sa partida contra su Citadella est istada giogada bene, e is retes pro su Caseddu sunt istadas marcadas dae Deiola, Ceter e Gaston Pereiro. Pro is aversàrios su gol est isdtadu fatu dae Donnaruma a sa coa de sa gara.

Is lombardos ghiados dae Goretti sunt a su 7 postu in classìfica de sa Sèrie B e contra is ruju-blu si sunt pasados giogadores titolares meda.

Sa prima rete pro su Casteddu est lòmpida gratziàs a Deiola, cun d’una iscutta de conca, serbidu dae su tertzinu Zappa.

Su 2-0 dd’at realizadu Ceter, pustis una respinta a curtzu de Maniero pro more de un’iscutta de pee’ de Oliva de a tesu.

A su segundu tempus, su Casteddu marcat su 3-0 cun Gaston Pereiro bravu a aprofittare de un’àteru feu de su portieri lombardu.

Su Cittadella però, a coa de sa partida, realitzat su gol de sa bandela (3-1) gratziàs a Donnarumma, cun d’una bella rete a beru.

Su Casteddu diat tènnere sa possibilidade de fàghere su 4-1, ma pro sorte bona de s’iscuadra de Sèrie B, Joao Pedro at corpidu su palo.

Custu resultadu est una bona noa pro is ruju-blu ma sa gara benente at a èssere prus istragosa contra s’Udinese, pro ite s’iscuadra friulana at a gherrare pro chircare puntos pro sa sarbesa in custa istajone.

Is òmines de Mazzarri ant a proare bìnchere sa segunda partida de sighidu, e is tifos ant a èssere a su costadu insoro pro ddus agiudare a furriare s’àndala mala chi s’iscudra ruju-blu at pigadu in custa prima meitade de s’istajone.

Amus a bìdere ita at a capitare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Brevettes,Italia intre sas primas deghe in Europa: sinzales positivos mancari sa minimada.

Fintzas si si registrat una minimada pitticca in su numeru de sos brevettes, s’Italia resessit su mattessi a bintrare intre sos primos 10 Paisos in Europa. In su 2025,dittas e imbentores italianos ant presentadu 4.767 dimandas de brevettes, unu datu chi est minimadu de pagu cunfrontadu a s’annu passadu. Mancari custa minimada,peroe,s’Italia resessit a mezzorare sa posissione sua in sa classifica,arrivande a su postu 10 in su mundu e cunfirmandesi intre sos Paisos europeos prus attivos in custu campu.

Su campu chi si mustrat prus forte est cussu de sas carraduras e de sas macchinas, chi sighit a creschere mancari in su mentres atteros campos abbraccant.Appena pustis si agattant sas tennologias ligadas a sa movida de sas mertzes,comente sistemas de carradura e imballazu,sighidas dae macchina ispetziales e inzenneria tzivile. Unu cinnu positivu arribat fintzas dae sa creschida de su brevette unicu europeu, una cosa chi permittit de diffendere un’imbentu in prus Paisos cun d’una dimanda sola. Custa cosa faghet divennere simples sas protzeduras e minimat sos pretzios,facilitande pro sas ditta pitticcas e medias, ma fintzas pro sas universidades e tzentros de chirca, de tutelare sas ideas insoro e las ponnere in su mercadu.

Propriu in su campu de sa chirca pubbrica si annodittat su Cunsizzu Natzionale de sas Chircas, chi si cunfirmat intre sos interpretes printzipales in Italia e tenet unu bonu risurtadu fintzas a livellu europeu. Custu mustrat s’importantzia de sa chirca pubbrica po agguantare s’isviluppu e creare opportunidades novas. Mancari sos signales chi dant corazzu, addurant peroe difficultades. Sa minimada, mancari pitticca, in su numero de sos brevettes mustrat chi bi est ancora bisonzu de accomettare de prus sas dittas e sos imbentores, mescamente in d’unu campu internatzionale semper prus in cumpetissione. In prus,est de fundamentu minimare sas differentzia in sas zuras de s’Italia.

In tottu custu, s’Italia mustrat de tennere ancora capatzidades bonas in su campu de modernizzassione,resessinde a mantennere unu postu importante in Europa. Intamen, po mezzorare de prus at essere netzessariu imbestire de prus in sa chirca, accomettare sas dittas e azzuare sos zovanos a revertire sas ideas insoro in disignos chi si pottant faghere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22