A s’Unipol Domus de Casteddu is òmines de Gasperini sunt resèssidos a bìnchere cun su resurtadu de 2-1.
A marcare is retes pro is lombardos sunt istados Pasalic e Zapata, pro is sardos su capitanu Joao Pedro.

Custa borta però pro su is casteddajos su brasilianu no est bastadu, e is sardos sunt semper prus a solos in su fundu de sa classìfica de su campionadu.

Su primu gol est istadu de s’Atalanta, cun Pasalic iscarèschidu dae Zappa in àrea de rigore. Su Casteddu però at agatadu su pareègiu gràtzias a Joao Pedro serbidu dae Godin, bravu meda a brincare a Demiral e a frigare su portieri bergamascu Musso.

S’iscuadra nieddu-asula però at sighidu a giogare pro chircare de fàghere àteros gol, cun is sardos in dificultade a firmare is aversàrios.
Su 2-1 pro is lombardos est lòmpidu gràtzias a Zapata chi est istadu bravu meda a collionare in àrea su defensore ruju-blu Godin e, a pustis, a marcare sa rete. A in antis, a pèrdere sa botza est istadu s’àteru defensore casteddaju, Carboni.

In su segundu tempus Mazzarri at fatu intrare in campu s’atacante Pavoletti, e su Casteddu s’est fatu prus perigulosu a in antis, e in duas ocasiones est presu a su gol.

Ma is bergamascos non sunt abarrados a castiare e una pariga de bortas sunt lòmpidos a marcare sa rete de su 3-1, ma gràtzias a su portieri casteddaju Cragno e pro more de sa mira mala de is atacantes nieddu-asulos, no ant agatadu su gol. Custa pro is meres de domo sa de 6 partidas pèrdidas, sa de 4 pro s’allenadore Mazzarri chi at pigadu su postu de Semplici, su tècnicu chi s’annu coladu est resèssidu a sarbare is sardos

In sa partida sighente su Casteddu at a isfidare su Sassuolo, a pustis de sa pasada pro is cualificatziones mundiales de is natzionales.

At a èssere una gara chi is sardos ant a giogare in trasferta e at a èssere una partida istragosa pro ite is òmines de s’allenadore Dionisi sunt faghende unu campionadu bellu a beru

Una cosa però est segura, su Casteddu at a dèpere furriare s’àndala chi at pigadu in custa istajone, pro ite cun custos resurtados sa Sèrie B est semper prus a curtzu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Carbònia, su Museo de su Carbone: unu viazu in sos tempos de sa memòria de su Sulcis de sas minas.

In su corizone de Carbònia, a intro de sa ‘idditzola de de Serbariu, b’at a dies de oe unu de sos museos pius de importu de sa Sardigna. Est su Museo de su Carbone, chi est dedicadu a s’istoria de sas minas. Est unu logu chi nos contat non solu s’istoria de cussu logu, ma fintzas sa vida de òmines e fèminas chi po annos e annos ant triballiadu in cussas minas.

Serbariu, inube si triballiaiat dae su 1937 a su 1964, fuit comente una funtana de abba semper bundante, inube sa zente si nche catzaiat su sìdiu de su tribàlliu. Est cussu su logu chi at batidu dinare meda a sa zona, ma puru energia manna a totu s’Itàlia. Su carbone de cussas minas, infatis, daiat tribàlliu a sas fàbricas, a sas tzentrales e a sas ferrovias, diveninde motore de modernizatzione industriale de totu sa natzione nostra.

Addaghi ant serradu sas minas, cussos logos pariat chi nos nche los depimus ismentigare, ca pariat chi non b’aperat abbarradu pius nudda. Invetze, b’ant fatu unu prozetu de recùperu e de valorizatzione manna, dande vida noa a totu cussos logos, chi sunt divènnidos unu museo chi, ancora a dies de oe, betat a pare sa memòria istòrica, sa didatica e sa capatzidade de divulgatzione.

Po chie andat a bìere custu museo, b’at paritzos zassos de visitare. B’est sa lampisteria, chi est su logu inube b’at una mostra chi est aberta totu s’annu e chi nos contat s’istòria de su carbone, de sa mina e de sos caragolos suos,ma puru de sa ‘idda de Carbònia, nàschida in su 1938 po retzire sas famìlias de sos triballiantes. Incue b’at unu muntone de làmpanas antigas chi si impreaiant in sas minas, ma b’at fintzas trastes e documentos, filmigheddos de sos tempos de tando fatos a sos triballiantes e puru intervistas fatas addaghi sa mina fuit zai serrada.

B’at puru fotografias meda de una bellesa rara. In custos caragolos e percolos chi nos permitint de atraessare sa mina, si podent bìere totu sos logos chi cada die sos minadores pupulaiant addaghi andaiant a triballiare. In sa sala Argani bi sunt poi totu sas màchinas chi permitiant su tribàlliu a tempos de tando.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22