Si nch’est iscutu dae sa ventana pro evitare de èssere agredidu dae un’ursu, sa pobidda imbetzet s’est sarbada pro meràculu dae una calada de pee de s’animale.

Una note chi no at a pòdere èssere ismentigada dae una còpia de Pescosolido, in su Frusinate, chi si sunt agatados a afrontare un’ursu Marsicanu chi si nch’est apicadu finas a su primu pranu.

Is carabineris sunt intervènnidos a pustis de sa mutida de sa còpia de una chimbantina de annos chi fiat galu afartzada dae s’atopu cun sa bèstia.

Sa fèmina e su pobiddu si nche sunt agatados s’ursu a prus pagu de unu metru de distàntzia. In is retes sotziales sa pobidda at afirmadu chi intendende sonos chi beniant dae su terratzu de s’aposentu de corcare a su primu pranu, pensende chi esseret calicunu imbucadu a furare, sunt essidos a foras faghende lughe cun is telefoneddos.

Sa fèmina, comente at bidu s’ursu at betadu una boghe e s’animale at chircadu de ddi donare una farrancada chi però non dd’at pitzigada, sende chi at fatu unu brìnchidu in segus e est resèssida a arribbare a sa ghenna ventana a 4 metros de distàntzia. Diferente sa sorte pro su maridu chi s’agataiat in s’àngulu a dereta de sa mugere, e bidende•si ungronadu dae s’ursu est istadu custrintu a s’imbolare de suta.

Pro bona sorte su corridòriu est de 3 metros, e mancari sa ruta siat istada lègia meda, s’òmine no at tentu cunsighèntzias graves, ma dolos in totu sa carena, prus che totu a s’anca e a s’ossu de s’ancua.

S’animale, assustadu cussu puru, at iscitu una pariga de corpos chi pro però ant corpidu solu una paràbola betza, mentras s’òmine feridu est resèssidu a torrare a imbucare a domo dae sa ghenna de sa coghina aberta in presse dae sa pobidda.

S’animale si nche fuidu in mesu a s’iscuridu. Is avistamentos de paros de ursu brunu Marsicano in biddas de sa Badde de Comino sunt semper fitianos: a s’acabbu de mese de ladàmine un’ursu sididu aiat chircadu de budare abba in una funtana posta in mesu a sa pratza printzipale de San Donato Valcomino, bidda chi est a largu unos canto chilòmetros dae Pescosolido.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22